بافڵ تاڵەبانی: بەچەند قۆناغێک تەواوی ھێزەکان ڕێکدەخەینەوە

بافڵ تاڵەبانی، هاوسەرۆکی یەکێتیی نیشتمانیی کوردستان سەردانی فەرماندەیی ھێزەکانی دژەتیرۆر، لیوای کۆماندۆ و ھێزەکانی ئاڵتونیی کرد و ڕایگەیاند، “بەچەند قۆناغێک تەواوی ھێزەکان ڕێکدەخەینەوە و لەسەر بنەمای نیشتمانی و پارێزگاریکردن لە ئاسایشی ھەرێم پێکھاتەکانیان دادەڕێژینەوە و دەبێت لەمەودوا ھێزەکانی یەکێتی ھێزی گەل و کوردستان بێت و لە ئاست بەرپرسیارێتی نیشتمانی بێت و لەچوارچێوەی یاسا بەرکارەکان و بەرژەوەندی گشتی ئەرکەکانیان ڕابپەڕێنن”.

بافڵ تاڵەبانی، هاوسەرۆکی یەکێتیی نیشتمانیی کوردستان، ئەمڕۆ شەممە سەردانی فەرماندەیی ھێزەکانی دژەتیرۆر، لیوای کۆماندۆ و ھێزەکانی ئاڵتونیی کرد و لەنزیکەوە لەچۆنییەتی مەشق و ڕاھێنان و پێکھاتەی سەربازی ھێزەکانی کۆڵییەوە و ئامادەی نمایشێکی سەربازیش بوو کە بەشێوازێکی نوێ ڕاھێنراون و ئامادەکراون بەھاوکاری ھێزەکانی ھاوپەیمانان.

لەبەرامبەر مەشقی چڕوپڕو و بەدیسپلینی ھێزەکان و بونیادنانی پێکھاتەکەیان لەسەر بنەما زانستییە سەربازییەکان، بافڵ تاڵەبانی سوپاس و ستایشی فەرماندە، و پێشمەرگە و کارمەندەکانی کرد کە شەو و ڕۆژ لە ئەرکدان و پشوودرێژانە خۆیان تەیاردەکەن و وەک ھێزێکی تۆکمە ئامادەن بۆ ڕوبەڕوبوونەوەی ھەر مەترسییەک کە ئارامیی ھەرێم تێکبدات.

بافڵ تاڵەبانی ڕوونیشیکردەوە “بەچەند قۆناغێک تەواوی ھێزەکان ڕێکدەخەینەوە و لەسەر بنەمای نیشتمانی و پارێزگاریکردن لە ئاسایشی ھەرێم پێکھاتەکانیان دادەڕێژینەوە و دەبێت لەمەودوا ھێزەکانی یەکێتی ھێزی گەل و کوردستان بێت و لە ئاست بەرپرسیارێتی نیشتمانی بێت و لەچوارچێوەی یاسا بەرکارەکان و بەرژەوەندی گشتی ئەرکەکانیان ڕابپەڕێنن”.

جەختی لەوەشكردەوە،”بەھیچ شێوەیەکیش نایەڵین هێزەكان تێکەڵ بە پرسە سیاسییەکان بکرێن و بۆ مەرامی شەخسی بەکاربھێنرێن، ھەر کەسێکیش یاساشکێنی کردبێت و ھێزەکانی یەکێتی بۆ کاری تایبەت بەکارھێنابێت و تێوەگلابێت بە کاری نایاسایی، ڕوبەڕوی دادگای دەکەینەوە، چونکە ئێوە خاوەنی مێژوویەکی پڕ لە شانازی و شکۆمەندین لە رووبەڕووبوونەوەی تیرۆر و تێکشکاندنی داعش، بۆ ئەمەش شانازی بە رۆڵ و ماندووبوون و گیانفیداییتانەوە دەکەین”.

بافڵ تاڵەبانی لەبارەی میکانیزمەکانی یەکخستنەوەی ھێزەکانی پێشمەرگەی کوردستان ئاماژەی بە ھەنگاوەکانی یەکگرتنەوە و ڕێکخستنەوەی ھێزەکانی پێشمەرگەی کوردستان کرد کە لەچوارچێوەی ھێزی نیشتمانی ئامادەدەکرێن بۆ پارێزگاریکردن لەئاسایش و ئارامی ھەرێم، ڕاشیگەیاند یەکێتی ئامادەیە بۆ سەرخستنی ئەم ھەنگاوە نیشتمانییە و دەمانەوێت لەسەر بنەمای ھاوسەنگی و تایبەتمەندێتی ھێزەکان ئەم پرۆسەیە سەربخەین.

بابەتی پێشتر

بافڵ تاڵەبانی پەیامێك ئاڕاستەی محەمەدی حاجی مەحمود دەكات

بابەتی دواتر

هێزێکی تایبەتی ئەمریكا لە عێراق کشایەوە

بابەتی پەیوەندیدار
Total
0
Share