ماوەی پێنج ڕۆژە 400 ئاگر لە چەند ناوچەیەکی یۆنان کەوتوونەتەوە و تا دێت ئاگر لە ئەسینای پایتەخت نزیکتر دەبێتەوە.
ئاگرەکان لە سەرەتاوە دارستانەکانی ئەو وڵاتەیان گرتووەتەوە، بەڵام ئەوەی ئەمڕۆ ترسی لای خەڵک و دەسەڵاتدارانی یۆنان دروستکردووە، سووتانی دوورگەی ئیڤیا-یە کە دووەم گەورەترین دوورگەی ئەو وڵاتەیە و بەوەش بازنەی ئاگرەکە لە ئەسینا نزیکدەبێتەوە.
لە نوێترین پەرەسەندنی ڕووداوەكەدا، ئەمڕۆ شەممە 7ی ئاب، ئاژانسی هەواڵی ڕۆیتەرز بڵاویكردەوە، ئاگر گەیشتووە بە ناوچەیەكی دەوروبەری ئەسینا و لە گەڕەكەكانی دەوروبەری شارەكە نزیكدەبێتەوە.
بەپێی ئامارەكان، تەنها لە ماوەی 48 كاتژمێری ڕابردوودا 16 كەس لە یۆنان سووتاون. شەوی ڕابردووش تەنها لە گوندێكی كەنار دەریا، هەزار و 153 كەس لە ئاگر دوورخراونەتەوە.
