لە بازگەیەکدا کە چەکدارانی داعش لەسەر ڕێگای مەخمور – هەولێر دایاننابوو چەند هاوڵاتییەکیان ڕفاندووە و ژمارەیەکیش برینداربوون.
دەزگای دژە تیرۆری کوردستان لە ڕاگەیەندراوێکدا زانیاری لەبارەی هێرشەکەی شەوی رابردووی داعشەوە خستەڕوو و بڵاویکردەوە، ” گروپێک لە چەکدارانی رێکخراوی تیرۆریستیی داعش لە نزیک گوندی کەندار لە سەر رێی مەخموور بازگەیەک دادەنێن و دوو کەس بریندار دەکەن و ژمارەیەک کەسی دیکەش دەستگیر دەکەن”.
لەلایەکی دیکەوە سەرچاوە عێراقییەکان باس لەوەدەکەن لەو ڕووداوەدا سێ هاوڵاتیی سڤیل برینداربوون کەلەلایەن ئەو چەکدارانەی داعشەوە تەقەیان لێکراوە و دووانی دیکە ڕفێندراون.
بەپێی میدیا عێراقییەکان، درەنگانی شەوی ڕابردوو چەکدارانی داعش لە نزیک گوندی کندار لەڕێگای نێوان مەخمور – هەولێر بە جلوبەرگی هێزە عێراقییەکانەوە بازگەیەکیان داناوە.
لەکاتی تێپەڕینی هاوڵاتییان بە بازگەکەدا دوو هاوڵاتییان ڕفاندووە و ئۆتۆمبێلێکی دیکە کە بۆ بازگەکە نەوەستاوە تەقەیان لێکراوە و سێ هاوڵاتی برینداربوون.
ئەو دوو هاوڵاتییەی ڕفێنراون تائێستا ئازادنەکراون و بریندارەکانیش گەیەنراونەتە نەخۆشخانەیەکی هەولێر بۆ چارەسەر.
