بەڕێوەبەرایەتیی ئاوی سلێمانی ڕایدەگەیەنێت، بەهۆی بڕانی كارەباوە دابەشكردنی ئاو لە زۆربەی گەڕەكەكان وەستاوە و داوا لە هاوڵاتیان دەكات دەست بە ئاوەوە بگرن.
بەڕێوەبەرایەتییەكە لە ڕاگەیەنراوێكدا دەڵێت، بەهۆی بڕانی کارەبا لە كاتژمێر 12ی شەوی ڕابردووەوە لە پڕۆژەی دووەمی ئاوی دوکان – سلێمانی کێشەی تەکنیکی دروستبووە.
بەهۆی ئەو كێشەیەوە دابەشکردنی ئاو لە زۆربەی گەڕەکەکانی شاری سلێمانی و قەزا و ناحیەکانی چەمچەماڵ، شۆڕش، ئەڵڵایی، بازیان و پیرەمەگرون وەستاوە.
بەڕێوەبەرایەتیی ئاو ڕوونیدەكاتەوە، تیمەکانیان سەرقاڵی کارکردن و چاكکردنن تا بەزووترین کات دابەشکردنی ئاو دەستپێبکاتەوە.
داواش لە هاوڵاتییان دەكات ئاگاداربن و دەست بە ئاوەوە بگرن.
