یانەی بەرشلۆنە بەفەرمی ئاشکرایکرد، لیۆ مێسی ئەفسانەی ئەرجەنتینی بەهۆی کێشەی داراییەوە ناتوانێت وەرزی 2021-2022 لە بارسا بەردەوامبێت.
یانە کەتەلۆنییەکە بەفەرمی لە ماڵپەڕی یانەکەوە ئاشکرایکردووە، لیۆ مێسی و ئیدارەی بارسا ڕێککەوتوون لەسەر نوێکردنەوەی بۆندی نێوانیان، بەڵام بەهۆکاری دارایی، واتا تێکچوونی هاوسەنگی دارایی یانە و کەوتنەبەر کێشەی ڕێساکانی یاری خاوێن، ناتوانرێت بۆندەکەی نوێبکرێتەوە.
LATEST NEWS | Leo #Messi will not continue with FC Barcelona
— FC Barcelona (@FCBarcelona) August 5, 2021
کێشەکە چییە؟
مێسی و سەرۆکایەتی بارسا لەچەند ڕۆژی ڕابردوودا قایلبوون بە نوێکردنەوەی بۆندی نێوانیان، بەڵام قەیرانی دارایی بەشێوەیەک بەرۆکی یانە کەتەلۆنییەکەی گرتووە، کە ناکرێت و ناتوانرێت بە نیوهێندە موچەی پێشوو بۆندی ئەفسانەکە نوێبکرێتەوە.
لە حاڵەتی نوێکردنەوە لەو باوردۆخەدا، یانەەی بەرشلۆنە هاوسەنگی خەرجی بەرامبەر داهات لەدەستدەدات، ئەوەش دەبێتە هۆی سزادانیان لەلایەن فیدراسیۆنی تۆپی پێی ئەوروپاوە.
تەنها ڕێگە ئەوەبووە چەندین یاریزانی گەورەی وەک گریزمان و دێمبیلی بفرۆشن بۆ هاوتاکردنەوەی ژمارەکان، بەڵام ئەم هەنگاوانە جێبەجێنەکراون، لەلایەک یانە داواکارەکان ئامادەنەبوون بۆند لەگەڵ ئەو یاریزانانە واژووبکەن، لەلایەکی دیکەوە کەمکردنەوەی ڕێژەی موچەی یاریزانان سوودی لە پڕۆسەکەدا نەبووە.
کێ دەتوانێت بیکڕێت؟
لە قورسترین دۆخی دارایی یانەکانی ئەوروپا بەهۆی قەیرانی داراییەوە، یانەکانی پاریس سان جێرمان و مانچستەر سیتی توانای داراییان بەهێزە و دەتوانن بۆند لەگەڵ یاریزانەکە واژووبکەن.
سەرەڕای ئەوەی تاوەکو ئێستا هیچ ڕێککەوتنێک لەنێوان یاریزانەکە و یانە داواکارەکانی ئاشکرانەکراوە، بەڵام سەرجەم ئەگەرەکان بەو ئاڕاستەیەن لە داهاتوویەکی نزیکدا یانەکانی پاریس سان جێرمان و مانچستەر سیتی بۆندی لەگەڵدا واژووبکەن.
ئەگەرێکی لاوازیش هەیە، یاریزانەکە دووبارە بگەڕێتەوە بۆ ئەرجەنتین، یاخود لە خولی ئەمریکا یاریبکات.
