نوێنەرایەتیی خۆبەڕێوەبەریی باکور و ڕۆژهەڵاتی سوریا لە هەرێمی کوردستان ڕایدەگەیەنێت، دوو ئەندامی پەیوەندییەكانی پەیەدە ئازادكراون، بەڵام هێشتا نوێنەری خۆبەڕێوەبەریی باکور و ڕۆژهەڵاتی سوریا لە هەولێر ئازادنەكراوە.
لە ڕاگەیەندراوێكدا، نوێنەرایەتیی خۆبەڕێوەبەریی باکور و ڕۆژهەڵاتی سوریا لە هەرێمی کوردستان ئاماژەی بەوەكردووە، “سێ ڕۆژ لەمەوبەر پاش تێپەڕبوونی 49 ڕۆژ بەسەر دەستبەسەرکردنی سێ سیاسەتمەدارەکەی ڕۆژئاوای کوردستان لەلایەن پارتی دیموكراتی كوردستانەوە، بێ ئەوەی کە هۆکاری دەستگیرکردنیان ئاشکرا بکرێت، دوو ئەندامی پەوەندییەکانی پەیەدە ئازادکران”.
باسی لەوەشكردووە،”بەڵام هێشتا جیهاد حەسەن نوێنەری خۆبەڕێوەبەریی باکور و ڕۆژهەڵاتی سوریا لە هەولێر ئازادنەكراوە”.
نوێنەرایەتیی خۆبەڕێوەبەریی ئەوەشی وتووە، “ئێمە وەکو نوێنەرایەتیی خۆبەڕێوەبەریی باکور و ڕۆژهەڵاتی سوریا لە هەرێمی کوردستان، داوا لە لایەنە پەیوەندییدارەکان دەکەین،هۆکاری ئازادنەکردنی ئەو هەڤاڵەمان ئاشکرابکەن و لە زووتریین کاتدا ئازادی بکەن”.
