ناڕەزایەتیی ئێرانییەكان دژ بە نەبوونی خزمەتگوزارییەكانی ئاو و كارەبا بەردەوامیی هەیە، شەوی ڕابردوو لە ئەسفەهان و شارێكی كوردی خۆپیشاندان بەڕێوەچوو.
نزیكەی دوو هەفتەیە لە ئەهواز و خوزستان ناڕەزایەتیی هاوڵاتییان دژی كەمیی ئاو دەستیپێكردووە، چەند ڕۆژێكە بۆ پشتگیری لێیان و هەروەها دژی كەمیی كارەبا و ئاو، لە ناوچەكانی دیكەش ناڕەزایەتی دەستیپێكردووە.
شەوی ڕابردوو لە ئەسفەهان، خەڵكێكی زۆر لە مەیدانی وەلی عەسر گردبوونەوە و ناڕەزایەتییان دەربڕی، پچرانی كارەبا و خراپیی خزمەتگوزارییەكانی دیكەی وەكو ئاو، خەڵكی نیگەران كردووە.
خۆپیشاندەران دروشمیان دژی دەسەڵاتی وڵاتەكە و ڕێبەری باڵای شۆڕش وتەوە، تەنانەت وێنەی خامنەئی سوتێنرا، تەنانەت دروشم بۆ ڕەزا شا وترایەوە.
لە شاری ئەیوان-ی پارێزگاری ئیلامی ڕۆژهەڵاتی كوردستانیش خۆپیشاندان بەڕێوەچوو، خەڵك بەهەمانشێوە لە بڕانی بەردەوامی كارەبا نیگەران بوون، پشتگیریشیان بۆ ناڕەزایەتییەكانی خوزستان و ئەهواز دەربڕی.
