کەنەکە دوو مانگە لە هەرێمی كوردستان سەرقاڵی دروستكردنی یەكڕیزییە بەرامبەر هێرشەكانی توركیا، هاوسەرۆكەكەی دەڵێت، زەمینە بۆ دروستبوونی یەكدەنگییەكە لەبارە و تەنها پارتی دیموكراتی كوردستان بێوەڵام بووە.
زەینەب موراد، هاوسەرۆکى کۆنگرەى نەتەوەیى کوردستان – کەنەکە، لەبارەی هەوڵەكانیان بۆ هێنانەدیی یەكڕیزی و یەكدەنگی بەرامبەر بە هیرشەكانی توركیا و دوورخستنەوەی ئەگەری شەڕی ناوخۆ، لە كۆنفرانسێكی ڕۆژنامەوانیدا قسەیكرد، ڕایگەیاند، لە ئەنجامى سەردانەکان بۆیان دەرکەتووە زەمینە بۆ یەکڕیزی و یەکدەنگیى نەتەوەیى هەیە و دەتوانرێت هێرش و داگیرکارییەكانی توركیا بشكێنرێن.
هاوسەرۆکى كەنەكە وتیشی، لەماوەى دوو مانگدا لە باشوورى کوردستان هەوڵیانداوە دەنگە کۆک و ناکۆکەکان ببینێت و هەوڵى یەکخستنیان بدات بەرامبەر بە مەترسی و هێرشەكان، بەتایبەت كە گەلى کورد لە ئیستادا زیاتر لە هەموو کاتێک پێویستى بە یەکدەنگی و یەکڕیزییە بۆ گەیشتن بە خواست و ئامانجەکان لەرێگەی گفتوگۆوە.
زەینەب موراد ئاشكراشیكرد، تاوەكو ئێستا پارتی وەڵامی داواكاریی كۆبوونەوەی لەگەڵ كەنەكە نەداوەتەوە، نە بە ئەرێنی و نە بە نەرێنی بەدەنگەوەهاتنیان نەبووە.
بەشێكی زۆری هەوڵەكانی كەنەكە بۆ دوورخستنەوەی ئەگەری شەڕی نێوان پارتی و پەكەكە بوو، بۆیە هاوسەرۆکەكەى كەنەكە جەختیكردەوە، “بە دوورکەوتنەوە لە شەڕى ناوخۆ دانیشتن لەسەر مێزى گفتوگۆ، دەتوانرێت کێشە ناوخۆییەکان کۆتاییان پێبهێنرێت، بە دیالۆگ چارەسەر بکرێن، چونکە نەبوونى یەکدەنگى و یەکهەڵوێستى، سەنگەرەکانى بەرگری لە کوردستان لاواز دەکات”.
