پۆلیسی سلێمانی ڕایگەیاند، لە درێژەی هەوڵەکانیان بۆ جێبەجێکردنی بڕیارەکانی قوباد تاڵەبانی، جێگری سەرۆکی حکومەت، کۆمەڵێک ئۆتۆمبێلی بێسەرەتا و چەکیان دەستبەسەرداگرتووە.
پۆلیسی سلێمانی لە ڕاگەیەندراوێکدا ئاشکرایکردووە، “لەژێر ڕۆشنایی بڕیارەكانی قوباد تاڵەبانی جێگری سەرۆكی حكومەتی هەرێمی كوردستان و بەسەرپەرشتیی ڕاستەوخۆی بەڕێوەبەری پۆلیسی پارێزگای سلێمانی، لەماوەی دوو ڕۆژی هەڵمەتی دەستبەسەرداگرتنی ئۆتۆمبێلی بێسەرەتا و چەكی بێمۆڵەت، هێزەكانی بەڕێوەبەرایەتیی پۆلیسی پارێزگای سلێمانی بەهاوكاری بەڕێوەبەرایەتیی پۆلیسی هاتوچۆی سلێمانی، توانییان دەستبگرن بەسەر ژمارەیەك چەك و ئۆتۆمبێلی بێسەرەتادا”.
بەپێی ئامارەکەی پۆلیسی سلێمانی، لە ماوەی دوو ڕۆژدا 11 چەك لە جۆری (2 كڵاشینكۆف، 9 دەمانچە) ، 7 ئۆتۆمبێلی بێسەرەتا ،150 لەزگە و پەردەی ڕەش، بڕێك دەرمانی ڕێگەپێنەدراو دەستی بەسەرداگیراوە.
هاوکات پۆلیسی سلێمانی ئاشکراشیکردووە، هەڵمەتی دەستبەسەرداگرتنی ئۆتۆمبێلی بێسەرەتا و چەكی بێمۆڵەت و لێپێچینەوەی یاسایی لەو شۆفێرانەی لەزگە و پەردەی جامڕەش بەكاردەهێنن، بەردەوام دەبێت.
