هەردوو وەزارەتی پەروەدە و تەندروستیی هەرێمی کوردستان بڕیاریاندا پێدانی ڤاکسین بە مامۆستایان لەپێشینەی ئەوانەبن کە ڤاکسین وەردەگرن، بۆ ئەو مەبەستەش ڕۆژانی سێ شەممە تایبەتکرا بە مامۆستایان.
لە ڕاگەیەندراوێکی هاوبەشی هەردوو وەزارەتی پەروەردە و تەندروستیدا هاتووە، دوابەدوای تاوتوێكردنی بابەتی پێدانی ڤاكسین بە مامۆستایانی، لەلایەن هەردوو وەزارەتی تەندروستی و وەزارەتی پەروەردە، بڕیاردرا بە پێدانی ئەولەویەت بە مامۆستایان بۆ وەرگرتنی ڤاكسینی دژەڤایرۆسی كۆرۆنا لەسەرجەم سەنتەر و داموودەزگا تەندروستیەكان بەپێی سیستەمی خۆتۆماركردن لە پۆرتاڵی (KURDVAC) یان پێگەی ئەلیكترۆنی: (https://vac.health.digital.gov.krd).
بۆئەم مەبەستە هەموو ڕۆژانی سێشەممە لە هەفتەدا تایبەت بە مامۆستایان دەبێت بەمەرجێك لە كاتی گەڕانەوەی ناویان ناسنامە یان پشتگیری قوتابخانەی لەگەڵدابێت.
