دوێنێ 18ی تشرینی یەکەم مستەفا کازمی، سەرۆکوەزیرانی عێراق سەردانێکی بۆ ئەوروپا لە وڵاتی فەرەنساوە دەستپێکرد و ڕاوێژکارێکیشی دەڵێت، گەشتەکەی ئابورییە.
بەپێی هەواڵی ئاژانسە عێراقییەکان لە سەردانەکەی شاندی عێراق بۆ ئەوروپا بە نێوەندگیری ئەمریکا باسلە پەیوەندی نێوان عێراق و ئیسرائیل دەکرێت و هەوڵدەدرێت ڕێچکەیەک بۆ دەستپێکردنەوەی ئاساییبونەوەی پەیوەندییەکانی هەردولا بکرێتەوە.
بەرپرسێکی عێراقی ئاشکرایکردووە، “لە سەردانی شاندەکەی عێراق لە پاریس و بەرلین و لەندەن باس لە ئاسایکردنەوەی پەیوەندی نێوان ئیسرائیل و عێراق دەکرێت”.
*********
کەمێک پێش ئێستا، مستەفا کازمی، سەرۆکوەزیرانی عێراق لەگەڵ هاوتا فەرەنسییەکەی جان کاستێ کۆبوویەوە و بڕیارە چەند پرسێکی سیاسی و ئابوری تاوتوێ بکەن
وردەکاری سەردانەکەی شاندی عێراق بۆ ئەوروپا
هشام داود، ڕاوێکارێکی کازمی، لەسەر وردەکاریی سەردانەکە بە ئاژانسی هەواڵی عێراقی ڕاگەیاندووە، “گەشتەکەی کازمی و شاندەکەی یاوەری بۆ ئەوروپا لایەنێکی ئابوریی هەیە و بڕیارە لەسەر چەندین دۆسییەی وەک پەرەپێدانی ئابوریی و ئاوەدانکردنەوە گفتوگۆ لەگەڵ لایەنە ئەوروپییەکان بکرێت”.
ئەو ڕاوێژکارە نەیشاردووەتەوە کە چەندین بانگهێشتی وڵاتان بە دەست عێراق گەیشتووە بۆ پەرەپێدانی زیاتری بازرگانی و ئابوری لەوانە ڕوسیا و وڵاتانی ڕۆژهەڵاتی ئاسیا و ئەوروپا.
ئەو بەرپرسە عێراقییە ڕاشیگەیاندووە، “لە ڕابردوودا عێراق لەژێر فشاری ئابوریی گەورەدا بووە و هۆکاری ئەمەش پەیوەندی بە سیاسەت و هەڵوێستی دەسەڵاتی حزبی بەعسەوە بووە، ئەوکاتە هەموو جیهان لە عێراق دەترسا، ئێستا عێراق دەیەوێت هاوسەنگ بێت لەگەڵ جیهان و ئەمەش وایکردووە لە هەموو جیهانەوە پێشنیازی کاری هاوبەشمان پێبدرێت”.
بەپێی زانیارییەکانی ئەو ڕاوێژکارەی سەرۆکوەزیرانی عێراق، لە سەردانەکەیدا شاندی عێراقی لەبارەی دروستکردنی میترۆی بەغداد (میترۆی هەڵوسراو) لەگەڵ پاریس گفتوگۆدەکەن و هەروەها درووستکردنی فڕۆکەخانە لە تەواوی پارێزگاکانی عێراق و پرسی کشتوکاڵ لەو بابەتانەن کە هەوڵدەدرێت ڕێککەوتنیان لەبارەوە واژوو بکرێت.
