وەزارەتی پەروەردەی حکومەتی هەرێم، ژمارەیەک بڕیاری لەبارەی خوێندنی ئەمساڵەوە دەرکرد و ڕایگەیاند، پرۆگرامەکانی خوێندن تەواو دەکرێن و تاقیکردنەوەی مانگەکان و کۆتایی وەرز لە کاتی دیاریکراوی خۆیدا ئەنجامدەدرێن.
هەروەها ئاماژە بەوەشکراوە، “خوێندنی پرۆگرامەکان بەپێی ڕیزبەندی کتێبەکان دەبێت و نابێت بەش و بەندەکان پاش و پێش بخرێن”.
لە بڕیارەکەی وەزارەتی پەروەردەدا هاتووە، “هەڵسەنگاندنی نیوە وەرز و تاقیکرنەوەی مانگەکان و کۆتایی وەرزەکان بەپێی ساڵنامەی خوێندنی ساڵی 2020 -2021 و ڕێنماییەکانی بەڕێوبەرایەتیی گشتیی ئەزموونەکان لەکاتی خۆیدا ئەنجام دەدرێت”.
ساڵی خوێندنی 2020-2021 بەهۆی بڵاوبوونەوەی ڤایرۆسی کۆرۆنا لە 27ی ئەیلول بۆ قۆناغی 12ی ئامادەیی دەستیپێکرد و لە بەرواری 10ی تشرینی یەکەمیش بە یەکەم ڕۆژی دەستپێکردنەوەی خوێندن بۆ قۆناغەکانی یەک و دووی بنەڕەتی دیاریکرا، بەڵام مامۆستایانی سنووری پارێزگای سلێمانی و هەڵەبجە، بەهۆی دواکەوتنی موچەکانیان بایکۆتی دەوامیان ڕاگەیاند.
