سەرۆك وەزیرانی عێراق لەگەڵ وەزیری داد و ژمارەیەك بەرپرسی كابینەكەی تاوتوێی بڕیاری دەركردنی لێخۆشبوونی تایبەت بۆ بەشێك لە زیندانیكراوانی نەوجەوانان و ژنان دەكات.
لە ڕاگەیەندراوێكدا نوسینگەی ڕاگەیاندنی مستەفا كازمی ئاماژەی بەوەكردووە، “ئەمڕۆ یەكشەممە سەرۆك وەزیرانی عێراق سەرپەرشتی كۆبوونەوەیەكی كرد، کە وەزیری داد و ژمارەیەک بەرپرسی دیکە تیایدا ئامادەبوون، بەمەبەستی تاوتوێکردنی دۆخی زیندانییەکان و ئاسانكاری بۆ دەرکردنی بڕیاری لێخۆشبوون بۆ بەشێک لە زیندانیکراوان”.
ئاماژەی بەوەشکردووە، لە کۆبونەوەکەدا بڕیاردراوە ڕێکاری بەپەلە بگیرێتەبەر بۆ دەرچوونی لێخۆشبونی تایبەت بۆ ژمارەیەک زیندانیکراوان لە چینی نەوجەوانان و ژنان.
هەر بەپێی ڕاگەیەندراوەكە، كازمی پشتیوانی خۆی بۆچاكسازیكردن لە دۆخی گرتووخانەكان و هەروەها بەرنامەی چاكسازیكردن لە كردار و بیركردنەوەی زیندانیكراوان دووپاتكردەوە.
