لەگەڵ سەردانەکەی ڕەجەب تەیب ئەردۆغان سەرۆک کۆماری تورکیا بۆ ئامەد، 26 مامۆستای ئاینی بەهۆی ئەوەی بە زمانی کوردی وتاریاندابوو، دەستگیرکران و بەشێکیشیان دوای دادگاییکردن، بەزیندانیکردن سزادراون.
دوای ئەوەی ڕۆژی 3ی ئەم مانگە بەبڕیاری دادگای تورکیا 26 ئەندامی جڤاکی ئیسلامی کوردستان و کۆمەڵەی مامۆستایانی ئاینی، لە ئیستانبوڵ دەستگیرکران، دوای دادگاییکردنیان، 11 لەو مامۆستا ئاینیانە بەزیندانیکردن سزادران.
هەروەها 15 مامۆستای ئاینی دیکەشیان ئازادکراون بەو مەرجەی ڕۆژانە بڕۆنە بنکە ئەمنییەکان و واژوو نوێبکەنەوە.
ئەو مامۆستا ئاینیانە بە تۆمەتی خوێندنی نوێژی هەینی و پێشکەشکردنی وتاری ڕۆژی هەینی بە زمانی کوردی، دەستگیرکراون.
حسێن بۆغاتەکین پارێزەری ئەو مامۆستایانە ئاشکرایکردووە، لە هۆڵی دادگادا، پێش بەڕێوەچوونی دادگاییەکە و تەنانەت گەیشتنی مامۆستاکان و بەرگریكردن لە خۆیان، “بڕیاری دادگامان لە کۆمپیۆتەرەکەدا بینیوە”.
دادگاییكردن و زیندانیكردن ئەو مەلایانە لەسەر وتاردان بە كوردی، هاوكاتبوو لەگەڵ سەردانی ڕەجەب تەیب ئەردۆغان سەرۆک کۆماری تورکیا بۆ ئامەدی باكووری كوردستان و قسەكردن لەسەر پێدانی ماف بە كورد.
