ژنێکی دانیشتووی هەولێر لە کۆنگرەیەکی ڕۆژنامەوانیدا ڕایگەیاند، دۆسیەی زیندانیکردنی هاوسەرەکەی یەکلاییناكرێتەوە و هیچ نووسراوێکی بۆ دادگاییکردن نییە، ئەوەش هێندە هەردووکیانی بێزار کردووە، هەڕەشەی خۆکوشتن دەکەن.
هاوژینی ئەو پیاوەی کە لەلایەن ئاسایشی هەولێرەوە زیندانیکراوە، لە کۆنگرەیەکی ڕۆژنامەوانیدا ڕایگەیاند، “هاوسەرەکەی پێشتر زیندانی بووە و ماوەی حوکمەکەی تەواوکردووە، کە هەشت ساڵ بووە، بەڵام دواتر لەلایەن ئاسایشەوە بانگهێشتکراوەتەوە و ماوەی سێ ساڵە هیچ نووسراوێکی دادگاییکردن یان یەکلابوونەوەی دۆسیەکەی نییە”.
بە وتەی هاوژینی زیندانیکراوەکە، “ڕۆژی پێنجشەمە هاوسەرەکەی لە زیندانەوە پەیوەندی پێوەکردووە و پێی ڕاگەیاندووە، ئەگەر دۆسیەکەی بە هەڵپەسێردراوی بمێنێتەوە، کۆتایی بە ژیانی خۆی دەهێنێت”.
ژنەكەش هەڕەشەی ئەوەیكرد، “ئەگەر دۆسیەكە یەکلایینەکرێتەوە ئەوا لەبەردەم ئاسایشی هەولێر ئاگر لەخۆم بەردەدەم”.
هاوژینی زیندانیکراوەکە داوای لە حکومەت و لایەنی پەیوەندیدار کرد گوێی لێبگرن و لانیکەم ماوەی زیندانیکردنی دیاریبکەن.
ڕاگرتنی (توقیف)ی تۆمەتبار، بەپێی یاسا لە 15 ڕۆژ تا شەش مانگە و دەبێت لەو ماوەیەدا دۆسیەکەی یەکلایبکرێتەوە و دادگاییبکرێت، ئەوکات ئەو تاوانەی ئاراستەیکراوە، یەکلاییدەکرێتەوە و ماوەی سزاکەی بۆ دیاریدەکرێت.
