بڕیارە ئەمڕۆ دووشەممە وڵاتانی ئۆپیک پڵەس كۆببنەوە و لەسەر بەردەوامیدان بە پلانی سنوورداركردنی هەناردەكردنی نەوت بۆ بازاڕەكانی جیهان ڕێككبكەون، عێراقیش پشتگیریی بەردەوامیدان بە ڕێككەوتنەكە دەكات.
ڕۆژی هەینی وڵاتانی هاوپەیمانیی ئۆپیک پڵەس نەیانتوانی بگەنە ڕێککەوتن لەبارەی ئەو بڕە نەوتەی لە مانگی ئابەوە بەرهەمی دەهێنن و ڕەوانەی بازاڕەکانی وزەی جیهانی دەکەن، کۆبوونەوەکە بەبێ ئەنجام کۆتاییهات.
لە ڕاگەیەندراوی ئەوكاتی کۆبوونەوەکەی ئۆپیک پڵەسدا هاتووە، کۆبوونەوەی دووەم ئەمڕۆ دووشەممە دەبێت، بڕیاریشە لە کۆبوونەوەکەدا بڕیاری زیادکردنی 400 هەزار بەرمیل نەوت ڕۆژانە بدرێت و لەسەرەتای مانگی ئابەوە جێبەجێ بکرێت.
لەوبارەیەوە ئیحسان عەبدولجەبار وەزیری نەوتی عێراق سەبارەت بە ڕێککەوتنی ئۆپیک پڵەس وتی، “عێراق پاڵپشتیی بەردەوامیدان بە ڕێککەوتنەکە دەکات بۆ کەمکردنەوەی بەرهەمهێنان تا کانونی یەکەمی 2022، لەگەڵ زیادکردنی ئەو بڕەی کە بڕیارە لە مانگی ئابی داهاتووەوە زیادبکرێت”.
عێراق دووەم گەورە بەرهەمهێنەری نەوتی ناو ڕێکخراوی ئۆپیکە لەدوای سعودییە، تێکڕای بەرهەمی عێراق 4.1 ملیۆن بەرمیلە لە ڕۆژێکدا لە دۆخی ئاساییدا، 92%ی داهاتی وڵاتیش پشت بە فرۆشتنی نەوت دەبەستێت.
سەبارەت بە کۆمپانیاکانی وەبەرهێنانی نەوت لە عێراق، کە ئیحسان عەبدولجەبار وەزیری نەوتی عێراق لەمیانی میوانداریکردنی لە پەرلەمانی عێراق ڕایگەیاندبوو، کۆمپانیای (بریتیش پترۆلیۆم) لە کێڵگەی گەورەی ڕمێلە دەکشێتەوە، هەروەها کۆمپانیای لوک ئۆیڵی ڕوسی لە کێڵگەی قەرەنە-2 پشکەکانی بە کۆمپانیا چینییەکان دەفرۆشێت، وەزیری نەوتی عێراق ئەمڕۆ دڵنیاییدا لە کارکردنی کۆمپانیا بیانییەکان و پاراستنیاندا لە کێڵگە نەوتییەکان و دەڵێت، “ئامانجمانە پارێزگاری لە کەشوهەوای وەبەرهێنان بکەین”.
وەزیرە عێراقییەکە ئەمڕۆ دڵنیاییدایە کۆمپانیا نەوتییەکان و لە ڕاگەیەندراوێکی نوسینگەکەیدا وتی، “ئامانجمانە پارێزگاری لە وەبەرهێنان لە کەرتی نەوتی وڵات بکەین و هەوڵیش دەدەین بۆ هێنانی هاوبەشی ستراتیجی نوێ”.
