هەشت ڕێكخراوی نێودەوڵەتی و ناوخۆیی لە عێراق داوا دەكەن، حكومەت لێكۆڵینەوە لە دەستگیركردنی چالاكوانان بكات و سەرجەم ئەو كەسانە ئازاد بكرێن كە لە خۆپیشاندانەكانی 2019ەوە دەستگیركراون.
هاوكاتی ڕۆژی جیهانیی مافی مرۆڤ ئەمڕۆ پێنجشەممە 10ی كانونی یەكەم، ڕێكخراوی لێبوردنی نێودەوڵەتی یاداشتنامەی هەشت ڕێكخراوی نێودەوڵەتی و ناوخۆیی عێراقی بڵاوكردووەتەوە، تیایدا داوا لە حكومەتی عێراق دەكەن لێكۆڵینەوەیەكی دادپەروەرانە و گشتگیر بكرێت لە حاڵەتەكانی دەستگیركردنی ئەو چالاكوانانەی لە خۆپیشاندانەكانی تشرینی یەكەمی ساڵی 2019ەوە تا ئێستا دەستگیركراون و ئازاد بكرێن.
لە یاداشتنامەكەی ئەو هەشت ڕێكخراوەدا كە ڕێكخراوی لێبوردنی نێودەوڵەتیشیان تێدایە داوای ئەوەشكراوە، لێكۆڵینەوە لە كوشتنی دەیان چالاكوان و ڕۆژنامەنوس و پارێزەری عێراقی بكرێت كە لە خۆپیشاندانەكاندا كوژراون.
ئەو ڕێكخراوانە لە یاداشتەكەیاندا باسیان لەوەشكردووە، هەردوو حكومەتی عێراق و هەرێم پابەندی ئەو بەڵێنانەیان نەبوون كە داویانە بۆ ئەوەی بە یاسا نێودەوڵەتی و عێراقییەكان، ئەو كەسانەی تاوانیان دژ بە ڕۆژنامەنوسان و چالاكوانان ئەنجامداوە ڕوبەڕووی یاسا بكەنەوە.
