ڕێکخراوی تەندروستیی جیهانی هۆشداری لە مەترسیی دەلتا کۆرۆنا دەدات و ڕایگەیاند، بەراورد بە ئەلفا کە سەرەتا لە بەریتانیا دۆزرایەوە 60% بۆ 80% خێراتر دەگوازرێتەوە.
ڤایرۆسی دەلتا کۆرۆنا هاوشێوەی ئاگر لە وڵاتانی جیهاندا بڵاودەبێتەوە و ڕێکخراوی تەندروستیی جیهانییش دەڵێت، مەترسییان هەیە لە بڵاوبوونەوەی خێرای زنجیرەی گۆڕاوی دەلتا کۆرۆنا، ڕاگرتنی بڵاوبوونەوەی کۆڤید – 19 بە ڕێگایەک بۆ ڕاگرتنی سەرهەڵدانی زنجیرەی نوێ دادەنێت.
تیۆدرۆس ئەدهانۆم جیبریسۆس، بەڕێوەبەری ڕێکخراوەکە دەڵێت، “باشترین ڕێگا بۆ ڕێگریکردن لە سەرهەڵدانی زنجیرەی نوێی کۆرۆنا ڕێگریکردنە لە بڵاوبوونەوەی ڤایرۆسی کۆرۆنا (کۆڤید – 19)”.
وتیشی، “زۆر بەڕوونی دەڵێین زیادبوونی ژمارەی توشبووان بەمانای زیادبوونی ژمارەی زنجیرەی نوێ، لەبەرامبەردا کەمی ژمارەی توشبووان واتای کەمبوونەوەی ژمارەی زنجیرەی نوێیە”.
ناوەندی ئەوروپی بۆ چاودێریی نەخۆشییەکان ڕایگەیاندووە، پێشبینی دەکەن ڕێژەی 70%ی توشبووانی کۆرۆنا لە مانگی ئابدا جۆری دەلتا بێت، لە کۆتایی ئەو مانگەشدا بۆ 90% بەرزبێتەوە لە وڵاتانی ئەوروپادا.
لە ویلایەتە یەکگرتووەکانی ئەمریکاش ڕێژەی توشبووان 10% بووە و ئێستا ڕێژەکە بۆ 35% بەرزبووەتەوە.
زنجیرەی کۆرۆنای هیندی کە بە “دەلتا” ناسراوە بەڕێژەی 40% بەهێزترە لە زنجیرەی ئەلفا کە سەرەتا لە بەریتانیا سەریهەڵدا، بەپێی توێژەرانی فەرەنسی زنجیرە نوێیەکە بەڕێژەی 50% بۆ 80% خێراتر دەگوازرێتەوە.
زنجیرەی نوێی کۆرۆنا “دەلتا” بۆ یەکمجار لە هیندستان سەریهەڵدا و لە مانگی نیساندا بڵاوبووەوە، ئێستا لانیکەم لە 85 وڵاتی جیهان بوونی هەیە بەڕێژەی جیاواز.
