پۆلیسی گەرمیان ڕایگەیاند، خاوەنی خوارنگەی ” پیتزا و شاورمەی سالار” دەستگیرکراوە، دوای ئەوەی 800 کیلۆ گۆشتی خراپبوو و گەنیوو لە خواردنگەیەدا دۆزراوەتەوە.
لە ڕاگەیەندراوێکدا کە وێنەیەکی بۆ تۆڕی میدیایی ئێستا نێردراوە تێیدا هاتووە، ” دوای ئەوەی لەلایەن لیژنەی قایمقامیەتی قەزای کەلارەوە، بەهۆی بوونی زیاتر لە (800 )کیلۆ گۆشت و قیمە و مریشک و خۆراکی گەنیوو و خراپ بوو ، پیتزا و شاورمەی سالار داخرا، بە بڕیاری دادوەر خاوەنی خواردنگەکە دەستگیرکراوە”.
بە وتەی پۆلیسی گەرمیان خاوەنی خواردنگەکە ناوی (ج – ع – ح )ە لە دایکبووی 1988ە و لەئێستادا بەپێی مادەی 368 بەندکراوە، کە مادەکە تایبەتە بە زیانگەیاندن بە کەسانی دیکە و بڵاوکردنەوەی نەخۆشی.
قائیمقامیەتی قەزای کەلار ئەمڕۆ پێنجشەممە ڕایگەیاند، لەکاتی پشکنینی دووكانی پیتزا و شاورمەی (سالار) لەناو بازاڕی شاری کەلار دەستگیراوە بەسەر بڕی (835) کیلۆ گۆشت و قیمە و مریشک و خۆراکی گەنیو و خراپبوودا.
