مەکتەبی سیاسیی یەکێتیی نیشتمانیی کوردستان، پەیامێکی بەبۆنەی جەژنی نەورۆز بڵاوکردەوە و دەڵێت، پێویستە ئامانجە نەمرەكانی نەورۆز و ڕاپەڕینی گەلەكەمان، بە شكۆداری بمێنێتەوە.
دەقی پەیامەکەی مەکتەبی سیاسیی یەکێتی:
جەژنی نەتەوەیی نەورۆز و سەركەوتنی ڕاپەڕین لە كۆمەڵانی خەڵكی كوردستان پیرۆزبێت
نەورۆز، كە لە دیرۆكی گەلەكەماندا هێمای خەبات و بەگژداچوونەوەی زوڵم و ستەم بووە، هەمیشە هاوكاتە لەگەڵ ساڵیادی ڕاپەڕینی ساڵی 1991 كە بە ڕزگاركردنی كەركوكی قودسی كوردستان، تاجی سەركەوتنی لەسەرنا.
ئەمڕۆ كە ئەم یادە دەكەینەوە، ناوچەكەمان ڕووبەڕووی گرژی و ناسەقامگیرییەكی سەخت بووەتەوە، بۆیە لە هەمووكات زیاتر پێویستمان بە پتەوكردنی یەكهەڵوێستی و یەكڕیزییە بەو جۆرەی ئامانجە نەمرەكانی نەورۆز و ڕاپەڕینی گەلەكەمان بە شكۆداری بمێنێتەوە و ئەوەی ماوە، لە داخوازیی نەتەوەیی و نیشتمانییەكانمان لە سایەی وڵاتێكی دیموكراتی و هاوسەنگی سیاسی و فیدراڵیدا، بەدیبێت.
