لە هەرێمی كوردستان تاقیکردنەوەی پۆلە ناکۆتاکان دەستیپێکرد

بەیانی ئەمڕۆ لە هەرێمی کوردستان تاقیکردنەوەکانی خولی یەکەمی ھەردوو وەرزی یەکەم و دووەمی پۆلە ناکۆتاکان دەستیپێکرد.

دڵشاد عومەر، بەڕێوەبەری گشتی پەروەردەی سلێمانی لەكۆنگرەیەكی ڕۆژنامەوانیدا كە پەیامێنری تۆڕی میدیایی ئێستا تیایدا ئامادەبوو، ئاماژەی بەوەكرد، ئەمڕۆ سێشەممە تاقیکردنەوەی خولی یەکەمی ھەردوو وەرزی یەکەم و دووەمی پۆلە ناکۆتاکان دەستیپێکرد و لە ڕۆژی 1/ 7/ 2021 تاقیکردنەوەکان کۆتایی دێت.

وتیشی، “وەک پارێزگای سلێمانی 428 هەزار خوێندکار تاقیکردنەوە دەکەن”.

هەروەها ،”سوپاسی مامۆستایان و کەسوکاری قوتابیانی کرد و دەستخۆشی لە فەرمانگەی کارەبا و تەندروستی کرد، کە بەدەم داواکارییەکانیان لە ناوەندەکانی خوێندنەوە چوون”.

بەهۆی بڵاوبوونەوەی ڤایرۆسی كۆرۆنا دەرگای ناوەندەکانی خوێندن چەند جارێك داخران و نمرەکانی وەرزی یەکەم بۆ وەرزی دووەمی خوێندکاران هەژمارکران.

هاوكات جگە لە پۆلی 12 کە تاقیکردنەوەی نیشتیمانیان ئەنجامدا، تاقیکردنەوەی نیشتیمانی بۆ پۆلی 9 لابرا.