بافڵ تاڵەبانی هاوسەرۆكی یەكێتی نیشتمانیی كوردستان ڕایدەگەیەنێت، بە هەمووشێوەیەک دژی یاساشکێنی دەوەستنەوە و پاراستنی موڵکی گشتی و سیمای سلێمانی بەئەرکی خۆیانی دەزانن، دەشڵێت، ھاوکار و پشتیوانی سەرجەم دامەزراوەکانی حکومەت دەبن بۆ ڕێگریکردن لەو دیاردەیە و یەکێتی بەرامبەر ئەو کارە نایاساییانە بێدەنگ نابێت.
بافڵ تاڵەبانی، ھاوسەرۆکی یەکێتیی نیشتمانیی کوردستان ئەمڕۆ دووشەممە لەگەڵ لیژنەی بەرەنگاربوونەوەی زیادەڕەوی سلێمانی کۆبووەوە، بەگوێرەی ڕاگەیەندراوێكی نوسینگەكەی، لە کۆبوونەوەکەدا بافڵ تاڵەبانی پشتیوانی و ھاوکاری تەواوی یەکێتی دووپاتکردەوە بۆ ڕێگریکردن لە زیادەڕەوی و بەرەنگاربوونەوەی ھەر ھەوڵێک کە ھەر کەس و لایەنێک دەستدرێژی بکاتە سەر موڵک و ماڵی گشتی و ڕایگەیاند، “بەتوندی ڕوبەڕووی هەرکەس و لایەنێک دەبینەوە کە لە پێناو بەرژەوەندی کەسی و تایبەت دەستدرێژی بکەنە سەر موڵک و ماڵی گشتی”.
ھاوسەرۆکی یەكێتی رٍونیشیکردەوە، “بە هەمووشێوەیەک دژی یاساشکێنی دەوەستینەوە و پاراستنی موڵکی گشتی و سیمای سلێمانی بە ئەرکی خۆمانی دەزانین، ھاوکار و پشتیوانی سەرجەم دامەزراوەکانی حکومەت دەبین، بۆ ڕێگریکردن لەم دیاردەیە و یەکێتی بەرامبەر ئەم کارە نایاساییانە بێدەنگ نابێت.”
ھەر لەکۆبوونەوەکەدا بافڵ تاڵەبانی ئاماژەی بۆئەوەکرد، “سەرۆکایەتی یەکێتی دژی ھەر مەرامێک دەوەستێتەوە کە بیەوێت یاسا و دادگاکانمان بخاتە ژێرپرسیارەوە و جەختی لەوە کردەوە ھیچ کەس و گروپێک لەسەروو یاساوە نین، بۆ ئەوەش ھەموو ھاوکاری و پشتیوانییەکی یەکێتی لەپێناو پاراستنی موڵکی گشتی دەربڕی”.
