بەرەبەیانی ئەمڕۆ چەکدارانی داعش چەند تاوەرێکی کارەبایان لە نزیک بای حەسەن لە سنوری کەرکوک تەقاندنەوە، وەزارەتی کارەبای هەرێم و عێراقیش بەڵێنی چارەسەری کێشەکان دەدەن.
بەپێی ڕاگەیەندراوی وەزارەتی کارەبای هەرێم، ئەمڕۆ كەمال محمد ساڵح وەزیری كارەبا پێشوازی لەزێدان خەلەف بەڕێوەبەری گشتی كارەبای باكوری وەزارەتی كارەبای حكومەتی فیدراڵی كردووە، لەو کۆبوونەوەیەدا كە بەڕێوەبەری گشتی دابەشكردنی كارەبای هەرێم ئامادەیبووە باس لەو گرفت و كێشە تەكنیكیانەی كارەبا كرا كە لەناوچە كوردستانییەكانی دەرەوەی ئیدارەی هەرێم لەنێوان هەرێم و حكومەتی فیدراڵدا بوونیان هەیە.
وەزیری كارەبا داوای لەهەردوو لێژنەی پەیوەنداری كارەبا لەنێوان هەرێم و حكومەتی ناوەند كردووە بەزووترین كات كار بۆ چارەسەركردنی سەرجەم ئەو گرفت و كێشانە بكەن .
هەر ئەمڕۆ لیژنەی باڵای هەردوو وەزارەت كۆبوونەوەكانی خۆیان دەست پێكردوو بڕیاردرا بۆ هەر پارێزگایەك كە ناوچە جێناكۆكەكان و ماددەی 140 دەیگرێتەوە لێژنەی تەكنیكی و ئیداریی تایبەت بەكارەبا دابمەزرێت.
