بافڵ تاڵەبانی بۆ باڵیۆزی کەنەدا: چالاکییە سیاسییەکانمان لە بەغداد زیاتر دەکەین

هاوسەرۆکی یەکێتیی نیشتمانیی کوردستان لە دەباشان، لە شاری سلێمانی پێشوازی لە باڵیۆزی کەنەدا لە عێراق کرد و ڕایگەیاند، بەغداد بۆ یەکێتی گرنگی سیاسی هەیە و لە هەرێمیش هەوڵەکانیان بەردەوامە دژی بەرتەسککردنەوەی ئازادی ڕادەبڕین.

لە دیدارەکەدا بافڵ تاڵەبانی، ھاوسەرۆکی یەکێتیی نیشتمانیی کوردستان و ئولریک شانۆن، باڵیۆزی کەنەدا لە عێراق، چەند تەوەرێکیان لەوانە پرسی هەڵبژاردن و ئازادی ڕادەبڕین تاوتوێکرد.

لەدیدارێکدا گفتوگۆکرا لەبارەی دەرئەنجامی سەردانەکەی وەفدی باڵای یەکێتی بۆ بەغدا و دیدار و کۆبوونەوە لەگەڵ سێ سەرۆکایەتییەکەی عێراق، هێز و لایەنە سیاسییەکان و باڵیۆز و دیپلۆماتکاران. ھەڵبژاردنی داھاتووی عێراق، یەکڕیزی ماڵی کورد و یەکخستنی ھەوڵەکان بۆ بەھێزترکردنی پێگەی ھەرێم تاوتوێکران.

بافڵ تاڵەبانی ئاماژەی بۆئەوەکرد بەغداد گرنگی سیاسیی خۆی هەیە و چالاکییە دیبلۆماسییەکانمان لەناوەند زیاتر دەکەین و لە هەوڵی بەردەوامدا دەبین بۆ بەدەستھێنانی مافەکان و پاراستنی بەرژەوەندییە باڵاکان. لەگەڵ دۆستەکانمان لە پەیوەندیدا دەبین و هەر هێز و لایەنێکیش ویستی چاکسازی هەبێت و بڕوای بە دیالۆگ و لێکتێگەیشتن هەبێت پێشوازی لێدەکەین. دەبێت چارەسەری ریشەیی بۆ کێشە هەڵپەسێردراوەکان بدۆزینەوە و هەمووان پێکەوە عێراق بەرەو کەناری ئارامی ببەین، ئەمەش پێویستی بە کۆدەنگی و یەکڕیزی سەرجەم لایەنەکانە.

سەبارەت بە ھەڵبژاردنەکانی داهاتووی عێراق ھاوسەرۆک رایگەیاند، بەڕاشکاوی بە ھەموولایەکمان راگەیاندووە لەگەڵ ھەڵبژاردنێکی پاک و بێگەردین لەکات و ساتی خۆیدا و زەمینەی لەباری بۆ بڕەخسێنرێت لەپێناو سەقامگیری سیاسی و زاڵبوون بەسەر ناکۆکییەکاندا.

لەتەوەرێکی تری دیدارەکە گفتوگۆ لەبارەی ئازادی رادەربڕین و سزادانی سیاسی و دەستگیرکردنی گەنجەکانی بادینانەوە کرا و بافڵ تاڵەبانی روونیکردەوە، ئەدەبیاتی یەکێتی خاڵییە لە سنووردارکردنی ئازادی رادەربڕین و بەھەمووشێوەیەکیش دژی بەرتەسککردنەوەی ئازادییەکان و دانانی بەربەستین لەبەردەم کاری میدیایی. باوەڕی نەگۆڕمان بەوەیە زەمینەی لەبار بڕەخسێنرێت بۆ میدیاکاران تاوەکو پیشەییانە کاری خۆیان بکەن و سنوورەکانی ئازادی کەسی نەبەزێنرێت، چونکە یەکێک لەکۆڵەکەکانی پێشخستنی دیموکراسی ھەرێمی کوردستان ئازادی بیروڕا و هەبوونی میدیای سەربەخۆ و ئازادە.

 

 

 

بابەتی پێشتر

لە ئەسفهان بە زمانی کوردی پێشوازی لە وەزیری کشتوکاڵی هەرێم کرا

بابەتی دواتر

ئیمارات بە کوشتنی ئەفسەرە کوردەکە تۆمەتبار دەکرێت

بابەتی پەیوەندیدار
زیاتر ببینە

عێراق: لە مانگی ڕابردوودا زیاتر لە 61 ملیۆن مەتر سێجا لە پێکهاتەکانی نەوتمان بەرهەمهێناوە

کۆمپانیای دابەشکردنی پێکهاتەکانی نەوت، ئەمڕۆ چوارشەممە 17ی شوبات ڕایگەیاند بەرهەمەکانی نەوت کە لەڕێگەی نەوتهەڵگرەکانەوە گواستراونەتەوە بۆ پارێزگاکان لە…
Total
1
Share