بەڕێوەبەرایەتیی گشتیی كارەبای سلێمانی رایدەگەیەنێت ئێوارەی ئەمڕۆ بەهۆی كێشەیەكی تەكنیكی هێڵەكانی گواستنەوەی كارەبای سلێمانی و هەولێر كەوتن كە بەهۆیەوە كێشەی بۆ زۆربەی وێستگەكان دروستكردووە و زۆربەی فیدەرەكان كە لە ئیشدابوون كەوتن، بەڵام لە ئێستادا دۆخەكە بەرەو ئاسایی بوونەوە دەچێت.
بەپێی راگەیەندراوێكی بەڕێوەبەرایەتیی گشتیی كارەبای سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە كاتژمێر 5:00 ی ئێوارەی ئەمڕۆوە بەهۆی كێشەیەكی تەكنیكی، هێڵەكانی گواستنەوەی كارەبای نێوان سلێمانی و هەولێر كەوتن كە ئەمەش كێشەی بۆ زۆربەی وێستگەكان دروستكرد و زۆربەی فیدەرەكانی كە لە ئیشدابوون كەوتن.
هەر لە راگەیەندراوەكەدا هاتووە، لە ئێستادا دۆخەكە بەرەو ئاسایی دەڕوات جگەلە وێستگەی تاسڵوجە كە هەردوو محاویلەكەی كێشەی تێدایە لەگەڵ وێستگەی شارباژێر و تیمەكانی چاكسازیی وێستگەكانيش لە هەوڵدان بۆ چارەسەركردنی كێشەكان و ئاساییكردنەوەی سیستمەكە.
