بەڕێوەبەری گشتیی تەندروستیی سلێمانی هۆشداری لەبارەی بەرزبوونەوەی ژمارەی توشبووان بە سكچوون دەدات و دەڵێت، ژمارەکە سێ هێندە بەرزبووەتەوە، ئەگەر کۆنترۆڵ نەکرێت دەبێتەهۆی بڵاوبوونەوەی کۆلێرا.
لە کۆنگرەیەکی ڕۆژنامەوانیدا دکتۆر سەباح هەورامی ڕایگەیاند، ژمارەی ئەوانەی تووشی سکچوون بوون سێ هێندە زیادیکردووە، ئەوەش جێگەی نیگەرانییە و ئەگەر کۆنترۆڵ نەکرێت ئەگەری هەیە ببێتەهۆی بڵاوبوونەوەی کۆلێرا.
کولێرا نەخۆشییەکى بەکترییە، (واتە بەهۆى جۆریک بەکتریاوە بڵاو دەبێتەوە)، کەتوشى مرۆڤ دەبێت،لەڕێگەى چونە ژوورەوەى بەکتریاى (Vibrio -cholera) بۆناو گەدە و ڕیخۆڵەکان (کۆئەندامى هەرس)، کەسی توشبوو توشی سکچون وڕشانەوەیەکى زۆر توند دەبێت. کۆلێرا نەخۆشییەکى (fico oral) واتە گواستنەوەى لەپیسییەوە بۆدەم. زۆر زوو بڵاودەبێتەوە و گەشەى لەدوو سەعاتەوە تا پێنج ڕۆژە، هەروەها ئەم بەکتریایە بۆماوەیەکى دوورودرێژ لەئاوى ناخاوێن و شوێنە شێدارەکـــــاندا دەمێنێتەوە.
دکتۆر سەباح هەورامی سەبارەت بە هۆکارەکانی بڵاوبوونەوەی سکچوون وتی، هۆکارەکەی زیاتر وشکەساڵی و پەنابردنی هاوڵاتییانە بۆ خواردنەوەی ئاوی بیر و سەرچاوە سروشتییەکان، کە پاکنین و ئەو ئاوانە کلۆریان تێدانییە و شیاو نین بۆ خواردنەوە.
بەڕێوەبەری تەندروستیی سلێمانی داوای لە هاوڵاتییان کرد کە دووربکەونەوە لە بەکارهێنانی ئاوی بیر و سەرچاوە سروشتییەکان بۆ خواردنەوە، ڕاشیگەیاند، “لە سبەینێوە بەڕێوەبەرایەتیی خۆپاراستنی تەندروستیی سلێمانی دەستدەکات بە زیادکردنی ڕێژەی کلۆر لە سەرچاوە دیاریکراوەکانی ئاوی ماڵان لە سلێمانی و دەوروبەری”.
داواشیکرد کە ئەو ماڵانەی ئاوی تانکەر داوادەکەن لەو تانکەرانە داوابکەن کە ڕەنگیان سپییە و ژمارەی مۆڵەتییان لەسەرە، چونکە ئاوەکانیان کلۆری تێدایە و لەوشوێنانە دەیانهێنن کە تەندروستیی سلیمانی بۆیان دیاریدەکات و شیاون بۆ خواردنەوە.
