پۆلیسی سلێمانی ڕایگەیاند، پیاوێک دەستگیرکراوە، سەرەڕای ئەوەی لە خێزانەکەی جیابووتەوە، کەچی لە ماڵیکدا پێکەوە ژیاون و دواتریش پیاوەکە تەقەی لە ژنەکە کردووە و کوشتوویەتی.
پۆلیسی سلێمانی لەسەر ڕوداوەکە دەڵێت، ” شەوی ڕابردو کاتژمێر 9:30 خولەک لەگەڕەكی بەكرەجۆ لەشاری سلێمانی دەنگی تەقە بیسترا ، پۆلیس گەیشتنە شوێنی ڕوداوەكە و دەركەوت پیاوێك فیشەكی ناوە بە ژنەكەیەوە و كوشتویەتی و هەڵاتووە “.
پۆلیس ئاماژەی بەوەشکردووە، ” دوای لێكۆڵینەوەكان و گەڕان و پشكنینەكان توانرا لە ماوەی ٣ کاتژمێردا تۆمەتبار بدۆزرێتەوە و دەستگیربكرێت، جێی ئاماژەیە بكوژ و كوژراو لەپڕۆسەی هاوسەرێتی لێكجیابوونەتەوە، بەڵام لە ماڵێكدا پێكەوە ژیاون”.
لەئێستادا تۆمەتبار (م ، ك ، أ ) لەدایكبووی 1968 بەبڕیاری دادوەر ڕاگیراوە و لێكۆڵینەوە لەگەڵیدا بەردەوامە.
