مستەفا كازمی، سەرۆكوەزیرانی عێراق، نامەیەكی لە ڕەجەب تەیب ئەردۆغان، سەرۆككۆماری توركیاوە پێگەیشت و تیایدا بانگهێشتی توركیا كراوە.
نووسینگەی سەرۆكوەزیرانی عێراق ئەمڕۆ چوارشەممە 14ی تشرینی یەكەم ڕاگەیاندراوێكی بڵاوكردەوە و ئاشكرایكرد، “مستەفا كازمی، سەرۆكوەزیران پێشوازیكرد لە فاتح یڵدز باڵیۆزی توركیا لە بەغداد، لە دانیشتنێكدا سەرۆكوەزیران و باڵیۆزی توركیا بەهێزكردنی پەیوەندییەكانی عێراق و توركیا-یان لە هەموو بوارەكاندا تاووتوێكردووە.”
بە گوێرەی ڕاگەیاندراوی نووسینگەی سەرۆكوەزیرانی عێراق، “فاتح یڵدز باڵیۆزی توركیا لە بەغداد، نامەیەكی ڕەجەب تەیب ئەردۆغان سەرۆكی توركیا-ی داوە بە كازمی كە ئەردۆغان بە دەستی خۆی نووسیویەتی، تیایدا سەرۆكوەزیرانی عێراق بانگهێشت دەكات سەردانی توركیا بكات.”
