دوای گردبوونەوەی بەشێک لە دانیشتوانی ناحییەی چوارقوڕنە، وەک ناڕەزایەتییەک لە بوونی شوێنێکی فرۆشتنی مەی شوێنەکە داخرا، بەڕێوبەری ناحییەکەش دەڵێت، “شوێنەکە مۆڵەتی دانانی کافتریایان هەبووە، نەک شوێنی فرۆشتنی مەی”.
لەسەر داخستنی شوێنەکە، نەهرۆ سەردار، بەرێوبەری ناحییەی چوارقوڕنە بە تۆڕی میدیایی ئێستای ڕاگەیاند، “ئەو کەسانەی کە شوێنەکەیان کردووە بە شوێنی مەی فرۆشتن مۆڵەتی شوێنی کافتریایان هەیە، نەک شوێنی فرۆشتنی مەی، بەڵام ئەگەر ئەو کەسانە مۆڵەتەکەیان بگۆڕن بۆ شوێنی فرۆشتنی مەی، بەپێی یاسا ناتوانین ڕێگریان لێبکەین”.
ئەمڕۆ 25ی ئایار، بەشێک لە مامۆستایانی ئاینی و دانیشتوانی ناحییەی چوارقوڕنە لەبەردەم بینای بەڕێوبەرایەتی ناحییەی چوارقوڕنە کۆبوونەوە و گلەییان دەربڕی لە کردنەوەی شوێنێک بۆ فرۆشتنی مەی.
لە سنوری ئیدارەی ڕاپەڕین 9 ناحییەی تێدایە، لەناو ئەو ناحییانەدا هیچ شوێنێکی فرۆشتنی مەی نییە و گەشتیاران و ئەو کەسانەی مەی دەخۆنەوە دەبێت بچنە ناو قەزاکان بۆ دەستکەوتنی مەی.
