سەرۆکی یانەی بەرشلۆنە، خوان لاپۆرتا هۆشداری بە یاریزانە گەورە و گرانبەهاکان دەدات و دووپاتیدەکاتەوە، کە توانای تەرخانکردنی موچەی خەیاڵییان نەماوە.
بەپێی زانیاریی میدیاکانی کەتەلۆنیا، خوان لاپۆرتا لە ماوەی داهاتوودا پڕۆسەیەک بۆ چارەسەرکردنی کێشەی چەندین ساڵەی یانەی بەرشلۆنە بەگەڕدەخات، ڕەنگە دەستبەرداری چەندین یاریزانی گەورە و گرانبەها ببێت.
لاپۆرتا پەیامێکی ئاڕاستەی یاریزانە زەنگۆڵەدارەکان کردووە، پێی ڕاگەیاندوون، ” ڕێزتان دەگرم، ئێوە مێژووی یانەکەن، بەڵام لە ئێستادا بەهۆی قەیرانی داراییەوە توانای تەرخانکردنی موچەی بەرزمان نەماوە.
بەڕێوەبەری وەرزشیی بارسا، ماتیۆ ئالیمانی ڕاپۆرتێکی خستووەتە بەردەست سەرۆکایەتی یانە و دەریخستووە، موچەی یاریزانانی “ئازولگرانا” لە ئاستی موچەی یاریزانانی یانەکانی دیکەدا نییە، بەڵکو زۆر بەرزترە، لە کاتێکدا هەمان ئەو یاریزانانە بەتەمەندا ڕۆچوون و لە 2015وە لە خولە ئەوروپییەکاندا دووچاری چەندین ئابڕوچوون بوون، پاڵپشت بەم ڕاپۆرتە لاپۆرتا بڕیاریداوە چەندینێکیان بفرۆشێت و موچەی ئەوانی دیکەش کەمبکاتەوە.
بالاگی: هەمووان بۆ فرۆشتن
گویلۆم بالاگی، ڕۆژنامەنوس و نوسەری ناودار و نزیک لە یانە کەتەلۆنیەکە ڕایگەیاندووە، کە ڕەنگە ڕێژەی یاریزانان لە “لیستی فرۆشتن” بگاتە 16 بۆ 17 یاریزان، لاپۆرتا و ستافەکەی تەنها مێسی و دی یۆنگ و پێنج یاریزانی دیکەیان لە لیستەکە دەرکردووە.
هەروەها بڕیاردراوە داهاتووی یاریزانە گەورەکانی وەک پیکێ و بوسکێتس و ئەلبا بە موچە و ئیمتیازاتی کەمتر یەکلاییبکرێتەوە، بەتایبەتیش گلەییان لە پیکێ هەبووە، کە پێشتر کۆبوونەوەی لەگەڵ سەرۆکی (یوێفا) ئەنجامداوە، لە کاتێکدا یانەکەیان لایەنگری سازکردنی خولی سوپەری ئەوروپییە.
