بەڕێوەبەرایەتیی هاتوچۆی دهۆک ئاشکرایکرد، بەرەبەیانی ئەمڕۆ بەهۆی ڕووداوێکی هاتوچۆوە سێ کەس گیانیان لەدەستدا.
ئازاد تەها بەرپرسی ڕاگەیاندنی هاتوچۆی دهۆک، بە تۆڕی میدیایی ئێستای ڕایگەیاند، بەرەبەیانی ئەمڕۆ یەکشەممە، کاتژمێر 5:30 خولەک، لە ڕێگای نێوان دهۆک – سێمێل و نزیک گوندی بازەلانێ، ئۆتۆمبێلێکی جۆری تۆیۆتا کۆرۆلا وەرگەڕا.
ئاماژەی بەوەکردووە، ڕووداوەکە بەهۆی تیژڕەوییەوە بووە و بەهۆیەوە سێ کەس، کە سەرنشینی ئۆتۆمبێلەکە بوون، گیانیان لەدەستداوە و زیانی زۆری مادییش بەر ئۆتۆمبێلەکە کەوتووە.
درەنگانی شەوی ڕابردووش لە ڕووداوێکی هاتوچۆدا لە سەر ڕێگای بیارە – خورماڵ، کەسێک گیانیلەدەستدا.
بەرزان عوسمان وتەبێژی بەرێوەبەرایەتیی پۆلیسی پارێزگای هەڵەبجە، بە تۆڕی میدیایی ئێستای وت، لە ئەنجامی پێکدادانی ئۆتۆمبێلێک لە جۆری نیسان و ماتۆڕسکیلێک لەسەر ڕێگای بیارە – خورماڵ، کەسێک کە دانیشتووی ناحیەی بیارەیە و تەمەنی 20 ساڵە، گیانیلەدەستدا و شۆفێری ماتۆڕسکیلەکەش بە سەختی برینداربووە.
