سەرۆکی حکومەتی هەرێمی کوردستان لە مەراسیمی دانانی بەردی بناغەی پردی دەربەندی ڕانیە ڕایگەیاند، حکومەت هەموو هەوڵێکی چڕکردووەتەوە کە موچەی فەرمانبەرانی بدات و ڕوبەڕووی ئاستەنگە داراییەکان ببێتەوە.
مەسرور بارزانی، سەرۆکی حکومەتی هەرێم ئەمڕۆ 13ی تشرینی یەکەم لە مەراسیمەکەدا لە شاری ڕانیە ڕایگەیاند، “دەبێت سوپاسی هەموو خەڵکی کوردستان و ئەم دەڤەرە بکەین کە بەهۆی سەختی قەیرانی داراییەوە خۆیان ڕاگرتووە و بەداخەوە ئەم قەیرانە داراییە ئێمە دروستمان نەکردووە”.
لە بەشێکی قسەکانیدا مەسرور بارزانی وتی، “پڕۆژەمان بۆ هەموو پارێزگاکانی هەرێم هەیە و بڕیارە چەند کارگەیەکی وەرگرتنەوەی گەنمی جوتیاران لە پارێزگاکان دروستبکەین کە لە ئاست ماندوبوونی جوتیاراندا بێت”.
سەرۆکی حکومەت ئاشکرایکرد، هەندێک پڕۆژەی دیکە لە لەلایەن ئیدارەی ڕاپەڕینەوە پێشنیازکراوە و حکومەتی هەرێم جێبەجێیان دەکات.
