حەج و عومرەی هەرێم ئاشکرایکرد، ئەو کەسانەی بە تۆمەتی بردنی ماددەی هۆشبەر بۆ سعودییە دەستگیرکران هاوڵاتیی و عومرەکاری هەرێمی کوردستان نین، بەڵکو خەڵکی پارێزگاکانی دیکەی عێراقن.
بەڕێوەبەرایەتیی گشتیی حەج و عومرەی هەرێمی کوردستان لە راگەیەندراوێکدا رایگەیاند، ئەو کەسانەی بە تۆمەتی بردنی ماددەی هۆشبەر بۆ سعودییە دەستگیرکران هاوڵاتیی هەرێم نین و، سەرجەم کۆمپانیاکانی حەج و عومرە و خاوەن کۆمپانیاکان بەوپەڕی رێزەوە پابەندن بە رێنماییەکانی بەڕێوەبەرایەتییەکەوە.
ئاماژەی بەوەشکرد، هەرێمی کوردستان دوور و نزیک پەیوەندیی بەو پرسەوە نییە، جێگەی داخە ئەگەر ناوی هەر پارێزگایەکی هەرێمی کوردستان بهێنرێت بە شێوازێکی خراپ باسکرابێت، هەر تۆمەتێکی خراپ لە هەر پارێزگا و ناوچەیەکی هەرێم هیچ بنەمایەکی نییە و دوورە لە راستییەوە.
باسی لەوەشکردووە، ئەو کەسانەی لە شاری مەدینە دەستگیرکران، وێنەکانیان لە میدیاکانی سعودییە و جیهان بڵاوکراونەتەوە، ئەمەش ئاماژەیەکی روونە کە ئەمانە دانیشتووی کام شوێن و کام ناوچەن.
جەختی لەوەشکردەوە، پەیوەندیی و هەماهەنگییەکی توندوتۆڵ و پتەومان لەگەڵ دەستەی باڵای حەج و عومرەی عێراق و هەموو دەزگاکانی دیکەی حکومەتی فیدراڵ هەیە، هەر رێنماییەکیش لە دەستەی حەج و عومرەی عێراقییەوە دەرچووبێت وەک خۆی جێبەجێکراوە.
