بەهۆی ئەوەی کۆتا شوێن، کە وەک دەسەڵاتی چەکدارانی داعش مابوو، بەشێك لە ڕۆژئاوای کوردستان بوو، منداڵان قوربانیی بیری توندڕەوی بوون، ئێستا ناوەندێک لە ڕۆژئاوا هەوڵدەدات ئەو منداڵانە چاکسازی بکات و بیریان لە توندڕەوی ئازاد بکات.
ناوەندی (هەوری) ئەو ناوەندەیە، کە تایبەتمەند کراوە بە گێڕانەوەی هزری منداڵانەی منداڵان، کە قوربانیی بیری توندڕەوین.
ناوەندەکە لە گوندی تەل مەعروف لە نزیک قامیشلۆ دروستكراوە و یەکەم ناوەندی تایبەتمەندە بەو بوارە لە رۆژئاوای كوردستان، داڵدەی کۆمەڵێک منداڵی قوربانیی دەستی داعشی داوە.
بەڕێوەبەریی خۆسەری دیموکراتیک لە ڕۆژئاوا دوێنێ 17ی ئایار پشتیوانیی لۆجستیی پێشکەشی ناوەندەکە کرد و پشتگیریی خۆی دووپاتکردەوە بۆ گەڕانەوەی منداڵەکان دوورخستنەوەیان لە هزری توندڕەوی.
لەو پاڵپشتیە لۆجستییانەی بەڕێوەبەریی خۆسەر پێشکەشی کرد، کتێبی فێرکاری و ئامێری سڵاید شۆ و پێداویستیی دیكە بوون.
نوسینگەی کاروباری چاکسازیی بەڕێوەبەریی خۆسەر لە ڕاگەێندراوێکدا ئاشكرایکرد، ئەم پشتیوانیانە بۆ دژایەتیکردنی ڕێکخراوی ئیسلامیی داعش و بیری توندڕەوییە لە ناوچەکەدا.
