سەرۆكی هەرێم نیگەرانی لەبارەی بەئامانجگرتنی خۆپیشاندەرانی عێراق دەردەبڕێت و داوادەكات سنوورێكی بۆ دابنرێت.
نێچیرڤان بارزانی، سەرۆكی هەرێمی كوردستان ئەمڕۆ سێشەممە تویتێكی بڵاوكردەوە و ڕایگەیاند، “بە نیگەرانییەكی زۆرەوە چاودێریی بەردەوامیی هەڕەشەكان بۆسەر خۆپیشاندەرانی عێراقی و دووبارەبوونەوەی بە ئامانجگرتن و هێرشكردنەسەریان دەكەین”.
دەشڵێت، بەتوندی ئیدانەی ئەو كارانە دەكەن، كە دەبێتە هۆی زیادبوونی ئاڵۆزی و بارگرژییەكانی وڵات.
سەرۆكی هەرێم جەختیشدەكاتەوە لەسەر پێویستیی سنووردانان بۆ ئەو كردەوانە و ڕادەستكردنی تۆمەتباران بە دادگا.
پەیامەكەی نێچیرڤان بارزانی لەكاتێكدایە، هەینیی ڕابردوو چالاكوانێكی خۆپیشاندانەكانی كەربەلا لەلایەن چەكدارانی نەناسراوە كوژرا، ڕۆژێك دواتریش ڕۆژنامەنووسێك لە دیوانیە درایە بەر گولـلە و بەسەختی برینداركرا.
