ڕێكخراوی هەنگاو بۆ مافەكانی مرۆڤ ڕایگەیاند، كۆڵبەرێكی خەڵی ورمێ، بەهۆی ڕاوەدوونانی لەلایەن هێزە ئەمنییەكانی ئێرانەوە، خۆی فڕێداوەتە نێو ڕوبارێك و خنكاوە.
بەپێی ڕاگەیەندراوێكی ڕێكخراوی هەنگاو بۆ مافەكانی مرۆڤ لە ڕۆژهەڵاتی كوردستان، كۆڵبەرێكی تەمەن 30 ساڵ بەناوی فەرزاد جەباری، دوێنێ لەكاتی كۆڵبەریدا خۆی خستووەتە ناو ڕوباری (بنار) لە ورمێ و گیانیلەدەستداوە.
ئاماژەی بەوەشكردووە، فەرزاد خەڵکی گوندی مەنسورئاوای سەر بە ناوچەی مەرگەوەری ورمێ بووە، دوای ئەوەی کەوتووەتە بۆسەی هێزە ئەمنییەكان، بۆ ئەوەی دەستبەسەر نەکرێت، خۆی فڕێداوەتە نێو ڕوبارەکە و خنكاوە.
بە پشتبەستن بە ئامارەكانی ڕێکخراوی هەنگاو بۆ مافەکانی مرۆڤ، لە ماوەی مانگی ڕابردوودا، لانیکەم 18 کۆڵبەر لە سنورەکانی ڕۆژهەڵاتی کوردستان کوژراون و بریندارکراون، کە 78%ی ئەو حاڵەتانە بە تەقەی ڕاستەوخۆی هێزە چەکدارەکانی ئێران بووە.
