دوای تێپەڕبوونی 11 ساڵ بەسەر لەسێدارەدانی فەرزاد کەمانگەر، مامۆستا و چالاکی مەدەنیی کورد لە ڕۆژهەڵاتی کوردستان و چوار لەسێدارەدراوی دیکە، تا ئێستا گۆڕەكانیان دیار نییە.
ئەگەرچی 11 ساڵ تێپەڕیووە بەسەر لەسێدارەدانی فەرزاد کەمانگەر، فەرهاد وەکیلی، شیرین عەلەم هوولی، عەلی حەیدرەیان و مەهدی ئیسلامییان، تا ئێستا کەسوکارەکانیان ئاگادار نەکراوەتەوە ڕۆڵەکانیان لە کوێ نێژراون.
بەپێی زانیارییەکانی ڕێکخراوەکانی مافی مرۆڤ لە ڕۆژهەڵاتی کوردستان، لەسێدارەدانی ئەو ٥ کوردە بێ ئاگادارکردنەوەی پارێزەر و بنەماڵەکانیان بووە و پرۆسەی دادگاییكردنی بەشێک لە لەسێدارەدراوان تەنها 20 خولەکی ویستووە، بۆ سەپاندنی سزای لە سێدارەدان بەسەریاندا.
فەرزاد کەمانگەر و هاوڕێكانی، ساڵی 2010 دوای گواستنەوەیان بۆ زیندانی ئەوین لە تارانی پایتەخت، لەسێدارەدران و تەنها هەواڵی لەسێدارەدانەکەیان بە کەسوکاریان گەیەندرا، تا ئێستاش نازانرێت لە کوێ تەرمەکانیان نێژراون.
