شەوی ڕابردوو، بە فڕۆكەی بێفڕۆكەوان، هێرشێك بۆسەر بنكەی عەین ئەسەدی ئاسمانی لە پارێزگای ئەنباری ڕۆژئاوای عێراق ئەنجامدرا.
بەپێی میدیا عێراقییەكان، پاش هێرشەكە، دەنگی ئاگاداركردنەوە بیستراوە و بنكەكە بەتەواوی داخراوە، دواتریش فڕۆكەكانی هاوپەیمانیی نێودەوڵەتی بە چڕی لە ئاسمانی ناوچەكە و نزیك بنكە سەربازییەكە بینراون.
هێرشەكە چەند كاتژمێرێك دوای ڕاگەیاندنی هاوپەیمانیی نێودەوڵەتی بە ڕادەستكردنی كەلوپەلی سەربازیی بنكەكە بە هێزە عێراقییەكان ئەنجامدراوە، كە نرخەكەی بە نزیكەی 1.8 ملیۆن دۆلار دەخەمڵێندرێت.
بنكەی عەین ئەسەد، كە هێزەكانی ئەمریكا و عێراقی تێدایە، لە كاتێكی پێشتری هەفتەی ڕابردوو ڕوبەڕووی هێرشێكی موشەكی بووەوە، بێ ئەوەی هیچ زیانێكی لێبكەوێتەوە.
