وەزیری دەرەوەی عێراق ڕایگەیاند، ئێستا ناوچەکە بە گۆڕانکاریدا تێدەپەڕێت و لەوەش دڵنیان کە هەر گۆڕانکارییەک لە پەیوەندییەکانی نێوان ئێران و ئەمریکا کاریگەری لەسەر دۆخی عێراق دەبێت.
فوئاد حسێن، وەزیری دەرەوەی عێراق لە کۆنگرەیەکی ڕۆژنامەوانیدا لە ڕۆمای پایتەختی ئیتاڵیا ڕایگەیاندووە، “ناکۆکییەکانی نێوان ئەمریکا و ئێران هەرجۆرێک بێت کاریگەری ئەمنی و سیاسی و کۆمەڵایەتی لەسەر عێراق هەیە”.
وەزیری دەرەوەی عێراق ئاشکرایکردووە، “ئیدارەی نوێی ئەمریکا بە سەرۆکایەتی جۆبایدن، بڕوای بە زمانی دیالۆگ هەیە لەگەڵ ئێران و ئێستا گۆڕانکاری لە ناوچەکەدا بە خێرایی ڕودەدات، ئێمەش لە ئەروپا و وڵاتانی دیکەین تا کاریگەری گۆڕانکارییەکان بە ئەرێنی بۆ عێراق بشکێتەوە”.
“هەر ڕوداو و گۆڕانکارییەک لە عێراق ڕوبدات، کاریگەری لەسەر وڵاتانی دراوسێ دەبێت و ئەگەر دۆخی عێراق بەرەو باشبوون بچێت ئەوا لە سودی ناوچەکەدایە”، ئەمەش بەشێک بوو لە قسەکانی فوئاد حسێن.
فوئاد حسێن ئاشکرایکردووە، ” ئێمە گەشتمان بۆ پایتەختەکانی جیهان دەستپێکردووە، پێشتر چوینەتە تاران و ڕیازی پایتەختی سعودییە، لە سەردانەکەماندا بۆ سعودییە محەمەد بن سەلمان پشتگیری خۆی بۆ زمانی گفتوگۆ دووپاتکردووەتەوە”.
لە ئێستادا گۆڕانکاری و گفتوگۆ لە ناوچەکەدا دەبینرێت و تورکیا لەگەڵ میسر و سعودییە پەیوەندییەکانی ئاسایی دەکاتەوە و لە ماوەی هەفتەیەکدا وەزیری دەرەوەی ئێران و شاندێکی ئەمریکا بە سەرۆکایەتی برێت مەکگۆرگ سەردانی عێراق و هەرێمی کوردستانیان کردووە.
