دوای کۆبوونەوەی لەگەڵ پارتی دیموکراتی کوردستان لەسەر پرسی هەڵبژاردن و دۆخی ئێستای هەرێم و پەیوەندی نێوان هەرێم و بەغداد، بەرهەم ساڵح، سەرۆککۆماری عێراق گەیشتە مەکتەبی سیاسی یەکێتی نیشتمانیی کوردستان لە هەولێر.
لە کۆبوونەوەکەدا بەرهەم ساڵح، لەلایەن قوباد تاڵەبانی و ڕێواز فایەق و دەرباز کۆسرەت ڕەسوڵەوە پێشوازی لێکرا.
بڕیارە دوای کۆبوونەوە لەگەڵ یەکێتی و پارتی، بەرهەم ساڵح، سەردانی کۆمەڵی ئیسلامی کوردستان بکات لە هەولێر و پرسی هەڵبژاردن و خۆ ئامادەکردنی کورد بۆ ئەو پرسە تاوتووێ بکات.
بەپێی زانیارییەکانی تۆڕی میدیایی ئێستا بەرهەم ساڵح، بڕیارە لەگەڵ هاوسەرۆکانی یەکێتی نیشتمانیی کوردستان لەسەر هەمان پرس کۆببێتەوە.
ئەوە لەکاتێکدایە هەر ئەمڕۆ بەرهەم ساڵح، سەرۆككۆماری عێراق لەگەڵ مەسرور بارزانی، سەرۆك وەزیرانی هەرێم و نێچیرڤان بارزانی، سەرۆکی هەرێم كۆبووەوە، لە کۆبوونەوەکاندا دۆخی ناوچەكە و پەیوەندییەكانی نێوان هەولێر و بەغداد تاوتوێكراون.
