ئەمشەو، سێشەممە لە چوارچێوەی ڕوبەڕوبوونەوەکانی چوونی قۆناغی نیوەی کۆتایی چامپیۆنزلیگ، یانەی ڕیاڵ مەدرید ڕوبەڕووی چێڵسی بووەوە و یاری نێوانیان بە یەکسانبوون کۆتاییهات.
لە ڕوبەڕوبوونەوەیەکی ئاگریندا یانەی ڕیاڵ مەدرید لە دی ستیفانۆ ستادیەم میوانداری چێڵسی کرد، یاریی نێوان دوو زەبەلاحەکە بە ئەنجامی یەکسانبوون (1-1) کۆتاییهات.
ڕاهێنەران، زینەدین زێدان و تۆماس توخێل بەوپەڕی وریاییەوە مامەڵەیان لەگەڵ وردەکارییە تاکتیکیەکاندا کرد، لەهەردوو تایمەکەدا سەرەتا بلوزی لەندەن باڵادەستی نیشاندا و لە کۆتاییەکاندا یانەی شاهانە.
گۆڵەکەی چێڵسی لە خولەکی 14 لەلایەن کریستیان پولیسیچ، گۆڵی یەکسانکەرەوەی ئەنجامەکەش لە خولەکی 29 لەلایەن کەریم بنزیمەوە تۆمارکران.
سەرەڕای ئەوەی یەکسانبوون باڵی بەسەر یارییەکەدا کێشا و هیچکام لە جەمسەرەکان براوە نەبوون، بەڵام تۆمارکردنی گۆڵێک لە یاریگای ڕکابەردا بۆ یاری گەڕانەوە لە ستامفۆرد بریج چانسێکی باشتر بە ئەستێرەکانی بلوزی لەندەن دەبەخشێت.
