دوای ڕوداوی ئاگرەكەی بەغداد، كازمی وەزیری تەندروستیی عێراق و ژمارەیەك كاربەدەستی دیكەی لە پۆستەكانیان دوورخستەوە.
ئەنجومەنی وەزیرانی عێراق دوای ئاگرەکەی نەخۆشخانەی ئیبن خەتیب کۆبووەوە و بڕیاری لێکۆڵینەوەی لە ڕووداوەکەدا و لیژنەیەکیش بۆ ئەو مەبەستە پێکهێنراوە.
لە ڕاگەیەندراوێکدا ئەنجومەنی وەزیرانی عێراق ڕایگەیاند، لێکۆڵینەوەکان بە سەرۆکایەتیی وەزیری ناوخۆ و ئەندامێتی، وەزیری پلاندانان، وەزیری داد، سەرۆکی دەستەی دەستپاکی، سەرۆکی دیوانی چاودێریی دارایی فیدراڵی، نوێنەری ئەنجومەنی نوێنەران ئەنجامدەدرێت.
لە کۆبوونەوەکەدا، بڕیار دراوە بە دەستپێکێشانەوەی وەزیری تەندروستیی عێراق لە کارەکەی و لێکۆڵینەوە لێی، هەروەها لێکۆڵینەوە لە ڕووداوی ئاگرکەوتنەوەکە و دەستنیشانکردنی کەمتەرخەمەکان و ڕەوانەکردنیان بۆ بەردەم دادگا.
هەروەها بڕیاردرا بە دەستپێکێشانەوەی پارێزگاری بەغداد و بەڕێوەبەری گشتیی تەندروستیی ڕەسافە و ڕەوانەکردنیان بۆ بەردەم لیژنەی لێکۆڵینەوە.
دەبێت لە ماوەی پێنج ڕۆژدا ڕاپۆرتی لێکۆڵینەوەکان ئامادەبکرێت و بخرێتە بەردەستی ئەنجومەنی وەزیران و لە ڕاپۆرتەکەدا پشت بە پسپۆڕانی بواری ناوخۆیی و تەندروستی ببەسترێت.
