بەڕێوبەری بانکی ناوەندیی ئێران، بەیانی ئەمڕۆ 12ی تشرینی یەکەم، لە سەردانێکی یەک ڕۆژەدا گەیشتە بەغدادی پایتەختی عێراق و چەند پرسێکی دارایی لەگەڵ بەرپرسانی عێراق، لەوانە سەرۆکوەزیران تاووتوێ دەکات.
بەپێی هەواڵێکی ئاژانسی ئیرنای ئێرانی عەبدولناسر هیمەتی، بەڕێوبەری بانکی ناوەندیی ئێران لەگەڵ بەرپرسانی عێراق پارەی گازی سروشتی و کارەبای ئێران کە داوییەتییە عێراق باسی لێوەدەکرێت.
لەکاتی سەردانەکەیدا هیمەتی ئاشکرایکردووە کە وەزارەتی دارایی عێراق ئامادەیە ئەو پارانە بداتە ئێران و وەک پابەندبوون بە ڕێککەوتنی دارایی نێوان هەردوو وڵات پارەکان لە عێراق وەردەگرن.
لە سەردانەکەیدا بەڕێوبەری بانکی ناوەندیی ئێران لەگەڵ هاوتا عێراقییەکەی و وەزیری دارایی عێراق و مستەفا کازمی، سەرۆکوەزیرانی عێراق کۆدەبێتەوە.
پێشتر مستەفا کازمی، سەرۆکوەزیرانی عێراق ئامادەیی وڵاتەکەی ڕاگەیاندبوو بۆ پێدانی ئەو پارەیەی لە وەرگرتنی گازی سروشتی و کارەبادا لەسەر عێراق کەوتووە.
