لە یاداشتێكدا، كە ئاڕاستەی سەرۆكایەتیی پەرلەمانی كردووە و داوادەكات بدرێتە حكومەتیش، پەرلەمانتارێكی كوردستان لەبارەی پیسبوونی ئاوی دەربەندیخانەوە هۆشداری دەدات.
عەلی حەمەساڵح، ئەندامی پەرلەمانی كوردستان، ئەمڕۆ چوارشەممە، یاداشتێكی ئاڕاستەی سەرۆكایەتیی پەرلەمان كردووە و ڕایگەیاندووە، “ئاوی دەریاچەی دەربەندیخان بەشێوەیەکی مەترسیدار پیسبووە و مەترسیی گەورەی چەندین نەخۆشیی ھەیە، لەوانە شێرپەنجە”.
عەلی حەمەساڵح ئەوەشی خستوەتەڕوو، “پاشماوەی پاڵاوگە و گۆڕەپانی نەوت و تێزابی تانجەرۆ و سلێمانی و ئێران، دەچێتە دەریاچەی دەربەندیخانەوە و بڕێکی زۆر قورقۆشمی تێدایە، شەش ڕۆژ جارێکیش ئەم ئاوە بەسەر ھاوڵاتییاندا دابەشدەکرێت بەبێ ھیچ فلتەرێک”.
ئاماژەی بەوەشكردووە، “بەپێی پشکنینەکان ئەو ئاوە، نەک بۆ خواردنەوە، بەڵكو بۆ ھیچ بەکارھێنانێک نابێت و نەخۆشیی پێست دروستدەکات”.
پەرلەمانتارەكەی كوردستان داواشی كردووە، یاداشتەی ئاڕاستەی حكومەتی هەرێم بكرێت.
