نرخی نەوت لەبازاڕەکانی جیهاندا ئەمڕۆ چوارشەممە دابەزی، ئەمە دووەم ڕۆژە نرخەکەی بەردەوامە لە دابەزین، هۆکارەکەشی بۆ دڵەڕاوکێکانی بەرزبوونەوەی ژمارەی توشبووانی کۆرۆنا لە هیندستان دەگەڕێتەوە، کە سێیەم گەورە هەناردەکاری نەوتە.
نرخی بەرمیلێک نەوتی خاوی برێنت بە بڕی 52 سەنت و ڕێژەی 0.8% دابەزی و گەیشتە 66.05 دۆلار، لەکاتێکدا دوێنێ سێشەممە نرخەکەی 48 سەنت دابەزی.
هەروەها نرخی بەرمیلێک نەوتی خاوی تەکساس 56 سەنت و بەڕێژەی 0.9 دابەزی، نرخەکەی بووە 62.11 دۆلار.
لەوبارەیەوە لاکلان شو، لە بانکی نیشتمانیی ئوسترالی دەڵێت، “ئەگەری هەیە بەهۆی بەرزبوونەوەی ژمارەی توشبووانی كۆرۆنا و فراوانبوونی قەدەغەی هاتوچۆ، کێڵگە نەوتییەکانی هیندستان کارەکانیان کەمبکەنەوە، ئەمەش کاریگەریی لەسەر بازاڕی جیهانی دەبێت”.
هیندستان، سیێەم گەورەترین بەکاربەری نەوتە لە جیهاندا، دوێنێ سێشەممە خراپترین ڕۆژی بەڕێکرد لە تۆمارکردنی ژمارەی گیانلەدەستدان بە كۆرۆنا، وڵاتەکە بەشێوەیەکی قورس ڕوبەڕووی قەدەغە و شەپۆلی دووەمی پەتاکە بووەتەوە.
