ڕێكخراوی تەندروستیی جیهانی دەڵێت، هەست بە “نیگەرانی” دەكات بەهۆی ئەگەری زیادبوونی حاڵەتەكانی كۆرۆنا لە مانگی رەمەزاندا لە باكووری ئەفریقا و ڕۆژهەڵاتی ناوەڕاست.
ئەحمەد مەنزری، بەڕێوبەری هەرێمایەتی ڕێكخراوی تەندروستیی جیهانی لە ڕۆژهەڵاتی ناوەڕاست وتی، ژمارەی حاڵەتەكان بە رێژەی 22% و مردن بە رێژەی 17% لە هەفتەی رابردوودا زیادیكردووە بەراورد بە هەفتەی پێشتر.
وتیشی، ئەم زیادبوونە لە حاڵەتەكان سەرچاوەی نیگەرانییە، لەو ناوچەیەدا كە لە مەراكیش-ەوە تا پاكستان درێژدەبێتەوە.
بەرپرسەكەی تەندروستیی جیهانی ئەوەشی خستەڕوو، هەست بە نیگەرانی دەكەن بەوەی ئەم دۆخەی ئێستا لەماوەی مانگی رەمەزاندا زیادبكات ئەگەر خەڵك پابەندی رێوشوێنە خۆپارێزییەكان نەبێت.
جەختی لەسەر ئەوەشكردەوە، رێوشوێنە خۆپارێزییەكان هاوكار دەبێت لە رێگریكردن لە بڵاوبوونەوەی زیاتری پەتاكە و ئەمەش بەوتەی ئەو لەگەڵ بنەما سەرەكییەكانی ئیسلام-دا یەكدەگرێتەوە.
لێدوانی بەرپرسەكەی تەندروستیی جیهانی لەكاتێكدا زۆرێك لە وڵاتانی ناوچەكە ئەو رێوشوێنانەیان كەمكردووەتەوە كە لە رەمەزانی ساڵی رابردوودا بۆ رێگری لە بڵاوبوونەوەی پەتاكە گرتیانەبەر.
س: مۆنت كارلۆ
