بەڕێوبەرایەتیی گشتیی ئاسایشی هەولێر ڕایگەیاندووە، بەرپرسی ئاسایشی دەروازەی سەرزێڕی لە گوندی بیگداودا لەلایەن پەكەكەوە “تیرۆر” كراوە.
لە ڕاگەیەندراوێكدا بەڕێوبەرایەتیی ئاسایشی هەولێر ڕایگەیاندووە، “کاتژمێر 5:30 ئێوارەی ڕۆژی پێنجشەممە ڕێکەوتی 2020/10/8 (غازی ساڵح ئالیخان) بەرپرسی ئاسایشی دەروازەی سەرزێڕی، لە گوندی بیگداودا، بە دەستێکی ڕەش تیرۆر کرا”.
ئاسایشی هەولێر ئەوەشی ئاشكراكردووە، “دوای لێکۆڵینەوەی ورد و هەمەلایەنە، دەرکەوت کە لەلایەن (پەکەکە)ەوە تیرۆر کراوە و پێشتریش بە ڕاستەوخۆ و ناڕاستەوخۆ هەڕەشەی تیرۆرکردنیان لێکردبوو”.
لە ڕاگەیەندراوەكە ئەوەش خراوەتەڕوو، “وێڕای سەرەخۆشی و هاوخەمیمان بۆ بنەماڵە و کەسوکاری شەهید (غازی ساڵح ئالیخان)، بە توندی ئیدانەی ئەم کارە تیرۆریستییە ترسنۆکانەیە دەکەین و ڕایدەگەیەنین کە ئەم کردەوە تیرۆریستییە بێ وەڵام نابێت”.
ئاسایشی هەولێر داوا لە هاوڵاتییان و خەڵکی هەرێمی کوردستانیش دەكات، “لە ئاست ئەم کارە تیرۆریستییە هەڵوێستیان هەبێت”.
