حكومەتی هەرێمیش بەشدارە.. گفتوگۆی ستراتیژی عێراق و ئەمریكا دەستیپێكرد

ئاڵای عێراق و ئەمریكا

گەڕی سێیەمی گفتوگۆی ستراتیژی نێوان عێراق و ئەمریكا بە بەشداری نوێنەری حكومەتی هەرێمی كوردستان دەستیپێكرد، لەمیانەیدا دۆخی ئاسایش و بەرگری و هەماهەنگیی ئابوری و وزە و بوارە ڕۆشنبیرییەكان تاوتوێ دەكرێت.

ئەمڕۆ چوارشەممە 7ی نیسان گەڕی سێیەمی گفتوگۆی ستراتیژی نێوان عێراق و ویلایەتە یەكگرتووەكانی ئەمریكا لەڕێی ڤیدیۆ كۆنفڕانسەوە دەستیپێكرد.

گفتوگۆكان تایبەت دەبن بە پرسەكانی ئاسایش و بەرگری و دژایەتی تیرۆر و، پرسە ئابورییەكان و وزە و بوارەكانی خوێندن و ڕۆشنبیری.

فوئاد حسێن، وەزیری دەرەوەی عێراق یەكێكە لە بەشداربووانی گفتوگۆكە و لە وتەی دەستپێكدا وتی، هێزە ئەمنییەكانمان تائێستا پێویستیان بەو بەرنامەیەیە كە ئەمریكا پێشكەشیدەكات پەیوەندیدار بە ڕاهێنان و پڕچەككردن و ئامادەكردن و پەرەپێدانی لێهاتوویی.

وتیشی، “هەوڵ بۆ درێژەدان بە كاری پێكەوەیی و هەماهەنگی ئەمنی دووقۆڵی دەدەین و جەختدەكەینەوە لەسەر پابەندی حكومەتی عێراق بە پارێزگاری لە ئەندامانی نێردە دیپلۆماسییەكان و بارەگا و دامەزراوەكانیان”.

ئامانج ڕەحیم، سكرتێری ئەنجومەنی وەزیرانی هەرێمی كوردستان بە نوێنەرایەتی حكومەتی هەرێم لە بەغدادە و بەشداری گفتوگۆكان دەكات.

لەبارەی بەشداریكردنەكەشیەوە نوسیویەتی، گەڕی سێیەم ئەمجارە لە وەزارەتی دەرەوەی عێراق لە بەغداد ئەنجامدەدرێت بۆ بەدواداچوونی ئەو ڕێکەوتنامە و یاداشتی لەیەکترگەیشتنانەی لە مانگی ئابی ساڵی 2020 لە گەڕی دووەمی گفتوگۆی ستراتیجی لە واشنتۆن ئەنجامدران.

دوێنی ئەنتۆنی بڵینكن، وەزیری دەرەوەی ئەمریكا لە تویتەرەكەیەوە ئاشكرایكرد، “لەگەل فوئاد حسێن، هاوتا عێراقییەكەم لە چوارچێوەی گفتوگۆی ستراتیژیی عێراقی ئەمریكی قسە دەكەین، تیاییدا پێشخستنی پەیوەندییەكانی نیوانمان لە هەموو بوارەكان دەخەیتەڕوو”.

سەبارەت بەو تەوەرانەی كە بڕیاری ئەمڕۆ لەو گفتوگۆ ستراتیژییەدا بخرێنەڕوو، كاتع ركابی، ئەندامی لیژنەی ئاسایش و بەرگریی ئەنجومەنی نوێنەرانی عێراق وتی، “ئەم گفتوگۆیە بابەتی نوێ لەخۆناگرێت”.

ئاشكرایكرد، “پرسی چونەدەرەوەی هێزە ئەمریكییەكان لە عێراق بابەتێكی گفتوگۆكان دەبێت و ستراتیژی هەردوو وڵاتەكە باس دەكرێت بۆ ئەو مەبەستە”.

بە وتەی ئەندامەكەی لیژنەی ئاسایش و بەرگری، پرسی ڕوبەڕوبوونەوەی تیرۆر و بابەتی ئەمنی و سەربازی و خوێندنی باڵا و كارەبا تەوەری دیكەی گفتوگۆكە دەبن.

بابەتی پێشتر

هەولێر.. گەنجێك كە بەناوی ئاسایشەوە پارەی لە هاوڵاتییەك سەندووە دەستگیركرا

بابەتی دواتر

قاسم ئەعرەجی: ئەمریكا بەڵێنی كشاندنەوەی بەشێك لە هێزەكانی داوە

بابەتی پەیوەندیدار
Total
2
Share