دوای بڵاوبوونەوەی دەنگۆیەک کە گوایە شەوی ڕابردوو چەکداری داعش لە ناوچەی بانی مقان بینراون، قائیمقامی چەمچەماڵ ڕایگەیاند، ئەو دەنگۆیانە ڕەتدەکەنەوە و ئەو ناوچانە بۆشاویی ئەمنیان تێدا نییە.
ڕەمەک ڕەمەزان، قائیمقامی قەزای چەمچەماڵ لە لێدوانێکدا بە تۆڕی میدیایی ئێستای ڕاگەیاند، “ئەوەی کە وتراوە لەسەر بینینی چەکدار ڕاست نین و هیچ لایەنێکی فەرمی و هێزە ئەمنییەکانیش ئەوەیان پشتڕاست نەکردووەتەوە”.
قائیمقامی چەمچەماڵ دەڵێت، ” تا ئێستا موختاری گوندەکان و هێزە ئەمنییەکانی ناوچەکە ئەوەیان پشتڕاست نەکردووەتەوە و تا ئێستا تەنها دەنگۆی ناو تۆڕە کۆمەڵایەتییەکانە”.
ڕەمەک ڕەمەزان دڵنیایی دەداتە هاوڵاتییان کە هێزە ئەمنییەکان ڕێکاری پێویست دەگرنەبەر بۆ پاراستنی سەروماڵییان و پێویست ناکات دڵەڕاوكی بەو دەنگۆیانە دروست بکەن.
