دوێنێ ئاڵایەکی گەورەی کوردستان لە گوندی “دزڵی” کە گوندێکی هەورامانی ڕۆژهەڵاتی کوردستانە هەڵکراوە و حزبی دیموکراتی کوردستانی ئێرانیش دەڵێت، ئاڵاکە بۆ ساڵیادی لە سێدارەدانی قازی محەمەد و هاوڕێکانی هەڵکراوە.
ڕاگەیەندنی فەرمی حزبی دیموکراتی کوردستانی ئێران لەبارەی ئاڵاکەوە بڵاویکردووەتەوە، ” تێکۆشەرانی دیموکرات لە گوندی “دزڵی” سەر بە شاری مەریوان، بەبۆنەی ڕۆژی شەهیدانی کوردستان ئاڵایەکی گەورەیان لەسەر چیاکان هەڵ کرد، ئەو ئاڵایە ئەوەندە گەورەیە کە لە ڕێگای سنە بۆ مەریوان و لە گوندەکانی دەوروبەریەوە دیارە”.
ئاڵاکە بەهۆی تێپەڕبوونی 74 ساڵ بەسەر لە سێدارەدانی قازی محەمەد، سەرۆککۆماری یەکەم کۆماری کوردستانەوە هەڵکراوە کە هەموو سالێک لە ژێر ناوی بەرزڕاگرتنی 10 ی خاکەلێوە لە ڕۆژهەڵاتی کوردستان مەراسیمی بۆ بەڕێوەدەبرێت.
